Awe mainta pa 9:00am ta programa pa tuma luga e reunion publico den cual e 21 Parlamentarionan di e fraccionnan di MEP, POR, RED y AVP lo mester vota pa pasa e adaptacion den e ley di Serlimar, presenta dor di Minister Otmar Oduber. Expertonan ta insisti cu e ley aki lo ta funesto pa henter e industria di recogemento di desperdicio, incluyendo pa Serlimar mes despues. E ta habri caminda pa trece un otro compania stranhero pa bin procesa sushi via un incinerator, aumenta tipping fee y hiba mayoria di e entrada di Serlimar. For di trempan trucknan di EcoTech ta dilanti Parlamento y ta spera esunnan di Serlimar tambe.
Parlamento como tal lo bira un campo di bataya awe entre e dos companianan envolvi den recogemento di desperdicio riba nos isla. Si mira e intencion di Gobierno den adaptacion di e ley aki y su tras e introduccion di Sugar Tax, ta un atake frontal contra tres compania resortando bou di MetaCorp, cu otro aña ta celebra 100 aña di existencia na Aruba.
Trahadonan preocupa cu nan trabou net den temporada di fin di aña ta conta awe riba e Parlamentarionan pa tene cuenta cu interes general y no di un politico individual. Cada un ta responsabel pa nan voto, aunke cu for di Gobierno a pone hopi presion riba nan e ultimo dianan aki. Ta parce cu Gobierno lo no tin mayoria awe si e reunion continua….pero esey ta ora di vota e lo bira conoci.
