Trahadonan di Aruba Airport Authority N.V. (AAA), hunto cu dirigentenan di sindicato Federacion di Trahadornan Aruba (F.T.A.), a drenta den Bestuurskantoor, pa asina minister Dangui Oduber atende cu nan y ricibi nan manifiesto. Tabata un confrontacion entre personal di Bestuurskantoor y Rudy Geerman di sindicato F.T.A.
E sindicato a exigi pa nan drenta den Bestuurskantoor, mirando cu nan a sinta warda riba e minister, pa asina nan entrega un manifiesto mustrando nan descontento cu e situacion na AAA. Varios personal di siguridad di Bestuurskantoor, CEA, personal di minister Dangui Oduber, tabata tey den e edificio pa atende cu e situacion y pidi pa e trahadonan sali for di e edificio.
Aki ta caminda cu e dirigentenan sindical a rabia y a pusha pa drenta e edificio.
E sindicalista a indica cu mientras cu e trahadonan ta warda den solo, e minister a opta pa bay den un rueda di prensa, ignorando e trahadonan por completo. Segun Rudy Geerman, minister sa cu nan tabata bin, pero a opta pa bay den un rueda di prensa. No ta cos pa haci cu hende, e sindicalista a splica. Polis no a pidi e trahadonan pa sali for di e edificio, pasobra ta cas di pueblo e ta. Pero si a pidi pa baha stem.
Loke cu Cuerpo Policial a pidi pa bandona e edificio, mirando cu tin un regla cu ta cuater persona por ta den e edificio, mientras cu ta warda e mandatario. E resto di e trahadonan a sali pafo y a keda para banda pabao di e edificio caminda cu ta mas fresco.
