Oficina di Duana na Playa a hay’e den problema diabierna den oranan di merdia pa atardi. Pa eror, a kita nan box di coriente. Esaki a causa cu e trabou a cay atras cu algun ora.
A combersa cu director di Duana Ricky Croes, kende a splica cu pa dialuna e servicio lo ta normal atrobe.
Loke cu a pasa ta cu den careda di 12’or di merdia den forma repentino coriente a bay den e edificio. A bin descubri cu e tabata un eror cometi door di ELMAR. E personal mester a kita e box di coriente di Departamento di Cultura cu a muda for di Horizonte Building (Edificio DA), pero esaki a afecta Duana cu tambe ta riba e mesun meter.
E fastioso ta cu server di Duana ta riba e piso unda a kita coriente. Nan a bay di biaha riba e e bateria di backup. Sinembargo e no a dura mucho, ya cu e aparatonan aki a cuminsa keinta, door di e calor eyden. Pa evita daño, mester a baha tur e servernan mesora.
No a keda otro cu informa brokernan di Duana via di media pasobra nan no tabatin internet tampoco. A calcula cu e situacion lo keda di e forma ey te 5’or di atardi. E team di IT a traha pa lanta e server, mientras cu mester a manda e personal cas, pa motibo cu nan no por a laga nan labora den e situacion reinante.
Pa dialuna lo trata di acelera e trabou, mirando e dianan di fiesta dilanti porta di e oficina ta cera.
