Tin preocupacion cerca e trahadonan di Parke Nacional Arikok. Nan a sali pafo, no den un protesta, pero pa expresa nan disgusto riba cierto maneho cu tin.
Rene Bernabela, presidente di sindicto TOPA, a splica cu na momento cu nan a wordo yama mainta, nan a acudi di biaha pa loke ta e situacion na parke. Sindicato TOPA ya caba tin basta dia ta mandando carta pa e gerencia di parke Arikok, pasobra eynan tin diferente problema. Un di e problemanan ta, ta e preparacion di CAO, di loke e sindicato tambe a bin ta haci pregunta, pero te ainda no ta haya un contesta di parti di gerencia di Parke Arikok.
Tambe riba e parti di promocion, cu tambe ta pega na e momentonan aki y esun cu a culmina henter e protesta di diaranson mainta ta, cu na momento cu e trahadonan a bin tuma nota via di un comunicado cu a keda pega na borchi cu nomber di Parke Arikok a wordo cambia y ningun hende tabata na altura di esaki. Ta un falta di respet pa e trahadonan, pero tambe e representantenan di e trahadonan, cual ta sindicato TOPA.
Riba dje rumornan persistente cu ta core cu gerencia of bestuur, di un manera of otro, cu a hipoteca full parke Arikok. Pa esaki, sindicato ta buscando contacto cu minister Otmar Oduber, pa nan bay den un reunion cun’e, pa por haya un claridad riba esaki, si esaki ta berdad, si of no. Ta colmo di tur colmo, caminda cu e gerencia di parke Arikok ta haci y deshaci y no ta comunica cu sindicato TOPA, den ningun momento. Pasobra despues cu TOPA a manda un carta pa sinta cu gerencia, entre otro pa sra. Da Silva, algun dia pasa y na caminda pa parke, ta haya contesta di sra. Da Silva, unda cu e ta laga sa, cu pa locual ta e parti di CAO, e sindicato cu nan ta sinta na mesa cun’e, ta sindicato SEPPA, pero miembronan di TOPA tambe ta welcome pa sinta.
Bernabela a bisa bon cla pa Da Silva ta na altura, cu si TOPA tin un miembro mes cu nan ta representa, sindicato TOPA mester ta envolvi den e negociacion di e CAO. No por ta asina cu ta falta respet na TOPA, bisando riba su mes cu ta cu sindicato SEPPA so nan ta sinta. TOPA no ta acepta esaki y lo trece dilanti na minister Otmar Oduber e falta di respet como sindicato.
E preocupacion
E trahadonan ta sinti cu nan tin un status di Ambtenaar. Aunke nan ta cay bao di fundacion, nan ta cay bao di DRH. TOPA a sigui esaki for di principio. Loke ta pasa, ta cu e informacion di locual ta e bestuur aki, e manera cu nan ta traha, ta cuestiona con e procedura di gobierno ta funciona y con esaki ta hinca den otro. Ora cu a haci pregunta prome biaha cu a sinta cu e gerencia di parke, ta tende yen di bay bin, pero nada concreto. Bernabela kier sa si e hendenan aki cu ta sinta den bestuur, sa e maneho con e structura di gobierno ta funciona, pa loke ta ambtenarij. A compronde awor aki for di tur e promocionnan cu mester a encamina, ta solamente un of dos di casi 2 pa 3 aña a keda cla. Ta puntra bo mes, ta ki tipo di bestuur ta maneha y ta dirigi un parke Arikok.
En todo caso, na e momentonan aki ta warda yamada di minister Oduber, pa por bay bestuurskantoor pa sinta cun’e. E situacion pa loke ta e directiva, e bestuur di parke Arikok, ta algo inaceptabel, e manera con nan ta traha y trahadonan no lo bay hala un stap atras.
CAO
Tin di compronde, e CAO aki a vence basta tempo pasa. Awor aki, den e carta cu a haya di sra. Da Silva, ta bisa cu nan no a ni cuminsa papia pa wak den e CAO, cu ya a vence caba. Esaki un biaha mas, ta un falta di respet pa e trahadonan di parke Arikok. Con por ta posibel cu nan ta un directiva na parke y ainda no a ni cuminsa wak den e CAO, y cuminsa yama e sindicatonan, tur cu ta envolvi cu ta representa e trahadonan na pia di trabao, pa mira con ta bay cuminsa atende cu e CAO aki. Di parti di TOPA, nan no lo acepta esaki ni un minuut mas.
