Recientemente Edmond Croes, director di e medionan di comunicacion Top 95 FM y Solo di Pueblo y alabes ruman di parlamentario Endy Croes, a expresa critica pisa contra e director di Bureau Rampenbestrijding Aruba (BRA) y tambe contra inspector di polis, Maureen Dirks. Pero…e no a conta cu e top ambtenaarnan lo opta pa no tuma su critica y insulto. Ambos a bay recherche y a entrega un keho penal contra e presentado, cu obviamente ta liga politicamente na MEP.
Un ke otro tin di haber cu e entiero di su mama, Sofia Croes, di algun siman pasa. Ey algo a bay robes o sea cu no a cumpli cu e reglanan vigente di Crisisteam. A pensa cu kisas como cu MEP ta na mando y nan tin un ruman parlamentario, cu e asunto lo bay mas facil. Nan no a conta cu na otro banda tin dos polis hopi integro den nan trabou.
Tanto e director di Bureau Rampenbestrijding Aruba (BRA) como e representante di Cuerpo Policial Aruba den Crisisteam a para duro cu ley ta conta pa tur hende, pues pa parlamentario di MEP tambe. A duna instruccionnan cla y raspa na e funerarianan riba e protocol di con ta atende cu entiero ora un persona muri di Covid-19. Como cu un funeraria specifico a opta pa no cumpli, a haci cu Crisisteam a atende debidamente cu nan den un reunion.
Edmond Croes a skirbi riba su pagina di solodipueblo.com cu: “E reunion di dia 24 di februari yama cu funerarianan, tabata un reunion hopi hostil unda cu nan a menasa hende pa firma cierto acuerdo. Nan por bula riba dal abao, e berdad ey ta skirbi y lo no cambia. Loke cu e hendenan aki ta haciendo ta cruel contra famianan cu nan pashent fayece di Covid-19, pio ainda, gaña pueblo cu un defunto por contagia otro hende cu Covid of plama virus. Absolutamente no ta berdad!”
Den un tono mas rabia, e doño di e medionan liga na e gobierno aki na mando a vocifera: “Bay ta mentiroso! Hunga cu dolor di pueblo! Boso por drumi anochi? Boso sa cuanto dolor boso dos ta causa cu boso reglanan estupido sin base? Ora un famia tin cu dera nan ser stima sunu den un saco di plastic? Ora cu a mustra boso riba e eror cometi desde maart 2020, en bes cu boso coregi, boso a bay haci pio, pa hunga powerplay, pasobra segun boso ta boso ta manda. Boso por keda bay polis tur dia, entrega keho penal y Edmond Croes por bay cera tambe! Pero hamas boso lo silencia e berdad di resona! Boso ta un set di abusador! Y miho cos cu boso por haci ta bay corigi boso fout di trapa riba famianan.”
Rino Hermans a confirma na nos cu el a entrega un keho mesora despues di tanto insulto contra dje den e medionan di Edmond Croes. E ta considera cu como un top ambtenaar, encarga cu maneho di calamidad na Aruba, e mester por wanta critica, pero no insulto ni menasa. A cana e caminda penal pa defende honor y integridad di dje personalmente, di crisisteam y di Bureau Rampenbestrijding Aruba (BRA).
E ley di smaad ta bini padilanti den nos codigo penal, articulo 2:223. Ey tin un castigo di prizon di un maximo di seis luna. Pero den caso cu por comproba “gekwalificeerde smaad”, cu ta aparece den articulo 2:224 na inciso 2, den cual ta considera cu ta lastra un hende pa malo y cu mentira, cu e castigo ey por subi te cu 3 aña di prizon. Un abogado conoci den comunidad a splica nos cu den pasado, casonan di smaad na Aruba ta caba cu un multa mas tanto.
