Ta parce cu Gabinete Wever-Croes II a yega na un “deal” p’e funcion di Altocomisario di Cuerpo Policial Aruba. Como cu mester a “sacrifica” e ex-altocomisario pa evita conflicto di interes politico, a nombra un Hulandes den su funcion. Aunke nunca a bis’e cu e ta bin djis pa “keinta banki”, awo a entreg’e un decreto gubernamental den cual a contrat’e pa solamente tres aña, cu ta coincidi “pa casualidad” cu e periodo di gobernacion di Gabinete Weber-Croes II. Pa si bin cambio di asignatura, cu e funcion y stoel di Vanessa Tjon-Kock ta sigura y bon cuida.
No tur polis ta contento cu e decision aki. Ta cuestiona con por “deal” un funcion asina crucial pa husticia, pa orden publico y pa garantisa democracia y maneho husto sin metemento politico.
Altocomisario casa di un politico
Si Vanessa Tjon no ta apto pa e funcion como casa di MinJUS, ta con si e lo por ta apto cu un minister di un otro asignatura siendo casa di e opositor den Parlamento? Acaso e MinJUS nobo lo confie den e funcion, cu e temor cu na cas e casa tin acceso na tur informacion y secreto di gobierno? Ta cua MinJUS lo confia un Korpschef (KC) cu ta un PEP (Politically Exposed Person)? For di momento cu e pareha a dicidi hunto cu Rocco Tjon ta drenta arena politico, nan mester por a imagina tambe ki repercucion esaki lo tin pa e futuro carera di Vanessa Tjon-Kock.
E “deal”
Gabinete Wever-Croes II, cu mester a acomoda Rocco Tjon como Minister di Husticia y Asuntonan Social, a hay’e ta move Altocomisario Vanessa Tjon-Kock. Como cu e lo ta un conflicto di interes pa tin un pareha casa siendo MinJUS y KC, a opta pa sacrifica e hende muhe. A conserva tur su derechonan, pero a kit’e di su funcion. Pero en bes cu a cambie pa un otro ministerio, a want’e bou di Ministerio di Husticia toch, pues subrayando e conflicto di interes cu a teme di dje ora a nombra Tjon como minister. A primintie cu ora Gabinete Wever-Croes II baha, cu su trabou ta ward’e ey.
Ramon Arnhem a huramenta aña pasa
Ramon Arnhem a huramenta como altocomisario di Cuerpo Policial Aruba na augustus 2022. A dura como shete luna pa su decreto gubernamental por a sali. Y pa colmo, aunke a nombr’e como e hefe di polis, a mar’e na un contract di solamente tres aña. Cu esey tur su plannan pa establece aki, cumpra cas y garantisa scol pa su yiunan, tur ta cay na awa.
Un altocomisario bon prepara
Ramon Arnhem tin un 2nd degree connection y tabata e districtchef di polis na Ijsselland, Hulanda. Ijsselland ta un luga varia den provincia di Overijssel, di cual tin estado di Zwolle, Deventer, Kampen, Steenwijk, Ommen y Staphorst. Arnhem tabatin mas di dies aña den cuerpo di polis di Hulanda. Den henter aparato di polis na Hulanda, e ta un di e poco homber di color den posicion di liderazgo strategico.
Den su funcion el a lidera un ekipo di 750 polis trahando den diferente warda, pa cuida un poblacion di alrededor di 500 mil habitante. Den su tempo liber e ta un boxdo. Pues, e sa con pa tira un bon mokete!
Pa mas lesa TREMPAN.COM
