Marlon Croes, director di DOW a pasa door di e ultimo desaroyonan cu tin entre otro di Watty Vos Boulevard. Esaki a sosode durante un conferencia di prensa cu a tuma luga na DOW, unda cu el a splica cu e ta un proyecto den ehecucion. Nan a caba di cuminsa na Maart y ta den pleno ehecucion. Tambe a experencia problema di awa, vooral na e altura di Kooyman, unda cu algun santo di trabao di construccion a subi caminda, pero tambe e parti cu a sufri mas daño, ta e rotonde na ex Codemsa.
A combersa cu e ehecutivonan di Mota Engil, cu ta e contratista cu ta haciendo e trabao aki. Esey ta nifica cu e trabao no ta cla. Nan a informa cu pa full e proyecto aki, nan a engage un consultant di Hulanda cu ta bezig ta simula e yobidanan di awa na Aruba, cu e intensidadnan cu Aruba tin.
Yobida
Croes a splica cu e cantidad di awa cu ta cay den un rato di ora, mas cortico ta bira hopi mas, pero nos infrastructura di handle e awa cu nos tin na costa, cerca di e area di Pos Chikito, Savaneta, Playa, Eagle Beach, cerca di lama, ta e puntonan mas abao. Bisando esey, nos infrastructura eynan no por bay handle e fluho di awa ey mas cu ta bin den un cantidad grandi den un tempo hopi cortico.
E ora ey, si nos kier haci’e, tin cu bay haci inversionnan grandisimo pa nos por crea facilidadnan pa e awa bay durante cu e awa ta yobe. Esey no ta un garantia tampoco.
Diferente manera
Por ehempel, na Miami, nan a traha facilidadnan bao di e caretera pa por handle awa unda truck mes por core aden. Dia cu nan a haya un awasero torencial, e bakinan aki tabata yen y e caminda tabata full bao di awa tambe. Na Hulanda tambe tin areanan ta cambiando cu nan no por handle e fluho, door di e cambionan climatologico. Nan ta dicidi awor aki, cu nan ta designa areanan cu awa ta para un tempo, pa asina no inverti hopi den nan infrastructura. Tin dos aspecto. Un di nan ta e fondo necesario pa inverti pa traha canalnan, semi drenahe grandi, cu ta wordo uza tres pa cuater biaha pa aña. E ora ey ta bay considera kico ta pisa mas. Ta acepta un fluho of un inundacion di e caretera temporario, durante cu e awa ta cay, pero asina cu e awa stop, dentro di cuater ora, e superficie, nos infrastructura mester ta seco bek, pa por sigui opera normal.
Bisando esey, bo no por haci’e no los for di un masterplan mas grandi. Naturalmente ta bay mantene e infrastructura cu tin, mehora unda cu por.
