Como ser humano nos ta pasa den diferente fase, sea den nos bida personal of laboral. Pa un mayor cu ta experencia cambio y desaroyo di e yiu(nan), esaki por trece insiguridad cu ne. Cambio drastico repentino den cualkier forma por tin un impacto riba nos estado emocional y afecta nos salud mental. Bida awendia ta bay asina acelera den comparacion cu e siglo pasa. Tin asina tanto expectativa y kisas presion sea den bida familiar of tarea laboral cu por afecta nos salud general. Ta p’e motibo aki ta importante pa para un rato keto y pone enfasis ariba nos cuido propio y particularmente nos salud mental.
Salud mental y cuido propio
Mundialmente y tambe na Aruba e topico di salud mental ta hayando su atencion debido. Esaki ta necesario pa por informa y educa comunidad di e importancia di mantene un bida saludabel y balansa. Tambe cu no mester tene berguensa si mester busca ayudo. Esaki por ta den un forma profesional pero naturalmente tambe cerca un persona di confiansa cercano cu ta positivo cu bon intencion y motivacion. Nos mester pone atencion na locual nos ta come y nos custumbernan. Tambe pa mantene un mente sano y saludabel ta encera pa nos preocupa menos. Haci ehercicio fisico y mentalmente frecuentemente. P’e parti fisico un caminata chikito of landamento cortico. Pa e parti mental, sinta un caminda comodo y enfoca riba e naturalesa por ehempel. Por haci un combinacion di ambos mes. Pensamento positivo y halamento di rosea trankilamente tambe ta yuda den e proceso aki. Tempo liber pa bo mes tambe ta hopi importante, corda riba bo mes. Corda nos niun no ta perfecto y semper lo siña di cualkier experencia. Siña conoce bo mes. Trata na evita pensamento nan menos placentero, enfoca ariba e positivo y laga los na locual no ta yuda bo crece. Balansa den bida ta sumamente importante. Ta necesario pa nos como adulto tin nos cuido propio como un prioridad, asina nos por cuida di nos yiu(nan) y tambe laga nan experencia y practica esaki.
Tienda di Educacion
Tienda di Educacion ta brinda sosten of guia na mayor of educador cu tin retonan cu e lantamento di un mucha. Pues mayor, bo no ta para bo so den esaki. Por tuma contacto cu Tienda di Educacion na 161 cual ta anonimo y cu ta disponibel di dialuna pa diabierna di 8 am – 6 pm nonstop. Like nan Facebook page pa asina keda informa of comunica tocante tur nan servicionan. Tambe por bira un siguido (follower) di nan Instagram. Tienda di Educacion ta situa den edificio di Centro pa Hoben y Famia, Sabana Blanco 68-C y ta na servicio di comunidad. Tur servicio ta gratis.
Ban crea un mundo caminda mayor, educador y tur mucha por expresa nan mes y por disfruta di un bida saludabel. Pa pregunta Yama 161.
