DTP ta haci nan control riba caminda semper y di forma sporadico. Segun Theo Kock, director interino di Departamento di Transporte Publico, nan tin nan orario cu nan ta core pa comntrola bus, taxi, autobus, etc. Hopi biaha no kier para un vehiculo ora cu nan tin turista den dje, pa motibo cu esaki por mustra malo pa e taxista y pa Aruba. Ta purba di evita esey.
E control no ta unicamente riba caya, pero por cuminsa for di nan oficina tambe. Nan sistema ta automatisa caminda cu nan ta hinca tur informacion den e sistema, cu un control grandi. Si topa cu algo cu no ta cumpli, e ora cu controladonan ta subi riba caya y busca esun cu comete cualkier infraccion.
Pa loke ta taxistanan pirata, DTP tin acuerdo cu cuerpo policial. Hunto nan a cuminsa cu un programa piloto for di aña pasa.
Cuerpo Policial a apunta un grupo special y ta bezig ta para tur cu ta haci transporte publico ilegal. Ta confisca e autonan envolvi. Fiscal ta tuma esaki hopi na serio, mirando e peliger cu e ta encera. E ta algo cu no por, segun Kock. No ta por nada cu tin permiso pa transporte publico en general.
BOA
Tin multa mara pa esunnan cu no cumpli. Kock a menciona cu e team ta hayando nan autoridad pa duna boet. Aworaki tin varios empleado di DTP cu ta siguiendo un curso di Bijzonder Opsporingsambtenaar (BOA), cu lo cuminsa den maart. Tin un grupo cu tin e certificado di BOA caba. E otronan por participa den e curso por bira un BOA, cu ta rekeri den Landsverordening.
