Un poderoso temblor a sacudi zuid di Alaska diabierna mainta, creando kraak riba caminda y sacando fo’i aire e cadenanan di television na Anchorage, e ciudad mas grandi di e estado, pero no tabata itn informe inmediato di herido.
E temblor di magnitud 7,0 a tuma luga 13 kilometer nort id Anchorage, un ciudad di 300 mil residente cu ta representa aproximadamente 40 porciendo di e poblacion di Alaska.
E movimento a bay riba un profundidad di 43 kilometer, Servicio Geologico di Merca a reporta.
E temblor, cu a wordo sigui pa varios aftershock, a produci fuerte sacudimento dentro di un radius di 50 km di su epicentro.
E gasoducto Trans Alaska, cu ta transporta crudo pa e terminal maritimo di Valdez, a cera como medida di precaucion, pero no a detecta ningun daño na e sistema, un vocero di e operador, Aleyska Pipeline Service Co., a bisa.
E infrastructura na Anchorage y rond di e ciudad, a sufri daño, polis a bisa riba Twitter, cu algun cas y edificio hopi daña, hopi caminda y brug mester a wordo cera.
Temblornan fuerte no ta algo straño na Alaska, un zona sismicamente activo, pero sa sosode den regionnan remoto y escasamente pobla unda casi no ta produci daño.
Alaska a registra temblor cu magnitudnan cu ta bay di 7 pa 8 por lo menos un biaha pa aña den promedio desde 1990, segun e website di e gobierno estatal. Zuid di Alaska a wordo golpea pa un devastador temblor di magnitud 9,2 na 1964, e di dos temblor mas poderoso cu a yega di a wordo registra.
