Recientemente dos atleta di cross fit, Christen Goeloe y Jarvis Garcia a biaha pa Colombia unda nan a participa den un evento di Expo Fitness. Hopi contento nan a bolbe Aruba cu e resultado obteni.
Despues di carnaval a biaha pa e competencia internacional na Medellin, Colombia, den cual evento a participa 108 ekipo. Den e Expo Fitness tin Revolution Games, cu ta un evento di cross fit. Eyden nan a participa den e categoria di intermedio.
E 108 teamnan a competi contra otro durante tres dia di evento. Ta saca inicialmente 16 team cu ta pasa pa e siguiente y despues ocho. E team aki a logra yega te den e 8-nan cu a bay final. Pues den e 108 teamnan, a keda na di ocho luga.
A pesar cu nan a yega basta leu y a bay trempan pa aclimatisa, ambos ta kere cu e altura a hunga un rol. A siña hopi kico ta nan punto fuerte y debilidad y con nan por complementa otro.
Goeloe ta preparando su mes pa participa den un evento na Corsou y lo combersa tambe cu su partner Garcia pa nan participa den e di dies Edicion di The Revolution Games di otro aña, sperando pa subi podium di premiacion.
Garcia su experiencia tabata igual cu esun di Goeloe. E evento ta un di esunnan mas grandi na Colombia. E echo cu nan a logra te na di ocho puesto ta algo grandi. El a yega di participa den evento na Corsou anteriormente. Pues esaki tabata esun di mas grandi y el a keda impresiona cu e bon organisacion tras di e evento.
