Cardioloog, Dr. Robert Dennert, recientemente a splica tocante Cardiology Symposium cu lo bay tuma lugar 16 di September 2023 durante un rueda di prensa na Hospital cu enfasis special riba educacion.
Conhuntamente cu Dr. Lacle, a lanta un centro grandi unda cu a inclui Angioplasty y Stents. Nos a puntra Dr. Robert Dennert kico lo por spera di esaki den futuro y con e conferencia venidero lo por contribui na esaki. Dr. Dennert ta splica cu na Aruba tin dos Interventiecardioloog cual ta su persona hunto cu Dr. Lacle, pero e team ta mas grandi cu nan dos so. “E team ta consisti di tur cardioloog, nos ta cinco cardioloog na Aruba pero tambe hunto cu verpleegkundige, eerste hulp, dus e ta henter un sistema,” Dr. Dennert ta splica.
Dr. Dennert ta splica cu loke nan ta enfoca riba dje den e team, nan grupo specialmente, hunto cu Hospital ta pa percura cu e cuido ta semper miho y ‘Up-To-Date.’ No ta asina segun Dr. Dennert cu ta simplemente pasobra ta Aruba e mester ta menos: ‘e cuido mester cumpli cu normanan internacional, esey ta locual nos kier.’ Dr. Dennert ta splica cu e normanan di Hulanda, hasta di Merca ta locual nan kier haci y semper logra pa nan pashentnan.
“Nos no a yega eynan ainda”
Dr. Dennert ta bisa cu ainda Aruba no ta completamente eynan, e ta splica cu innovacion den cuido medico en general ta hopi bon y nan no kier keda atrasa akinan na Aruba. E meta ta sigui pa haci Aruba e miho den region, cual ta algo cu por cuminsa mira caba mirando cu tin pashentnan cu ta biniendo for di Bonaire y otro islanan pa haya e tratamento adecua.
