E buki di Profeta Jonas ta siña nos te con leu rebeldia y desobedencia por yega ora nos sa masha bon locual Dios kier di nos, pasobra Dios a encarga nos cu esaki. Pero nos kier haci cos manera nos kier, sea pa complace cu otro hende of propio orguyo, pa fama. Nos ta core pa responsabilidad pasina sali for di e boluntad di Dios y haci manera nos mes kier. Tur esey ta rebeldia y desobedencia.
Pero den caso di Jonas tabata diferente. El a core pa e mision cu Dios a dun’e, pasobra e tabata kier pa Dios castiga Ninive, pasobra e sa cu si e predica e palabra di Dios, nan lo por arepenti y Dios lo tene misericordia di nan. Pasobra e pueblo di Ninive tabata den gran maldad. Hopi biaha hende ta desea pa Dios castiga otro.
Mayor, haci bo mes y bo yiunan consciente di esaki:
No ta posibel pa ningun hende desea castigo pa otro caminda Dios kier pordona;
No ta posibel destrui locual Dios kier construi;
No ta posibel stroba locual Dios kier avansa;
No ta posibel mata locual Dios kier duna bida;
No ta posibel maldiciona locual Dios a bendiciona, pasobra Dios su boluntad ta prevalece riba tur cos.
Jonas a trata di huy bay for di Dios su presencia, pero Dios a hiba Su presencia caminda Jonas ta y asina causa un tormenta y saca tur cos na cla.
Con bo ta reconoce spirito di Jonas?
Abo ta desea castigo pa otro hende y no kier duna chens pa nan arepenti y drecha bida?
Bo ta den rebeldia of bo tin un pica cu bo no a arepenti di dje?
Bo ta coriendo pa e yamada di Dios den bo bida?
Bo ta kere cu abo por castiga hende, famia of un organisacion?
Bo ta afilia cu hende cu no tin temor di Dios y ta enemigo di Dios? (Fariseonan tabata conoce Dios, pero toch nan tabata enemigo di Dios pa motibo di nan conducta, tradicion y idolatria).
Bo ta rabia cu Dios ora Dios no kier haci e cos manera abo kier?
Wak bon con Jonas a purba di logra su meta y pa huy for di Dios e mester a drenta un barco pagano (mescla cu mundo) y es mas, el a bay sconde diep den bodega pa asina ningun hende por pensa cu e ta un hebreo, pero ta dificil scapa for di Dios ora Su yamada ta riba bo bida.
E tormenta no a wordo causa pa motibo di e paganonan pero pa motibo di un yiu di Dios cu ta den rebeldia contra Dios y Su palabra.
Mescos awe nos por mira hobennan cu ta bon lanta den cas di famia ta afilia cu mal amistad. Y hopi biaha ora polis cay den e asunto ta nan ta prome cu ta sali den media, pero e dolor ta cu ora nan cay no ta solamente nan ta cay, pero e caida ta trece sufrimento pa henter e famia.
Hopi hoben no sa cu nan ta yama pa Dios for di den bariga di nan mama. P’esey den Efesionan 6:4 Dios ta bisa pa instrui nos yiunan den disciplina y instruccion di Señor.
Ora bo ta yama pa Dios, bo no por core pa Dios. Dios lo siugi bo y E lo manda advertencia fuerte pa bo. Sea conciente. Pastor Marcel Balootje
