Diasabra marduga pa 4:25 am, a sosode un accidente net pariba di aeropuerto. Na yegada di polis a topa cu Taxi 125. E taxista a conta cu el a perde control y a dal den e piedranan banda di caminda. E tabatin un pasahero abordo.
Pero, e holo di alcohol no a yud’e. A pidie pa e supla den e mashin y a constata cu e tabata burachi tras di stuur. Manera ta conoci, ley ta permiti pa bo tin te 220 ug/l di alcohol den bo sistema. Asina bo surpasa e nivel, ta castigabel pa ley.
Di acuerdo cu e maneho di Cuerpo Policial na momento cu gara un chauffeur burachi tras di stuur, a deten’e mesora na e sitio, transport’e pa ward’i polis pa por present’e dilanti un fiscal auxiliar, cu mayoria bes ta prepara bo citacion pa presenta dilanti hues y ta manda bo cas cu un rijverbod di algun ora. Depende cuanto b’a supla, por kita bo rijbewijs fo’i bo tambe.
Ta bon pa splica cu stuurmento di auto bou di influencia di alcohol awendia ta bin cu su consecuencianan devastado. E prome ta, cu si bo accidente, seguro no ta cubri e daño, sea parcialmente of completamente. E otro ta cu bo tin chens di perde bo rijbewijs pa un tempo of pa semper.
Y den e caso di e taxista, si Departamento di Transporte Publico haci su trabou debidamente, lo mester traha un rapport manda pa Minister Ursell Arends di transporte publico, pa kita e licensia di taxista. No ta exista pordon ni excepcion pa un taxista cu ta subi pasahero den subtaxi y e taxista ta burachi.
Den e dianan di fiesta aki, corda semper pa bo sali cu un chauffeur di reserva cu no ta bebe alcohol, pa stuur pa bo despues di fiesta of bebemento. Evita control, desgracia y problema despues pa bo mes y otronan cu inocentemente por bira victima di bo decision di stuur burachi.
