Diasabra marduga den careda di 1:00 am, polis a para un pick-up color shinishi numera A-42763 pa un control na altura di Professor Lorentzstraat na Oranjestad. Motibo pa e control ta pasobra polis a constata cu e chauffeur tabata stuur na un forma malo.
Despues di a lag’e supla, a confirma cu e chauffeur tabata burachi tras di stuur, pa cual a deten’e mesora. Un rato despues polis a para un otro auto marca Nissan modelo Versa numera A-72852 na altura di Ponton.
Aki tambe a ripiti e rutina di control, revisando e papelnan di e vehiculo, check rijbewijs di e chauffeur y pidie supla pa controla e nivel di alcohol den bo rosea. E control no a sali bon pa e chauffeur, pasobra a resulta cu e tabata basta betra, pa cual motibo a deten’e mesora na e sitio y a transporta ambos pa ward’i polis pa presenta nan dilanti un fiscal auxiliar.
Polis a adverti di trempan, hasta cu video di promocion, cu lo tin control adicional e dianan aki pa evita chauffeurnan burachi den trafico. Ta conseha pa semper sali cu un persona cu no ta bebe, pa por stuur despues di fiesta. E multa pa stuur auto burachi por ta basta halto y dependiendo e nivel di alcohol den bo rosea, bo por hasta perde bo rijbewijs!
