Usuarionan di 24ora.com a keda asombra di topa cu un pickup F150 di marca Ford color preto moviendo rond como Taxi. Esaki no ya usual y a hala atencion mesora. Ta cuestiona sinta esaki lo ta e nivel di servicio cu nos ta desea di brinda na turista. Specialmente si scucha autoridad di turismo constantemente indica cu kier eleva calidad en bes di cantidad. Pero cu e imagen di turista sinta den baki di pickup sigur no ta cuadra cu e promesa ey!
Pero for di Departamento di Transporte Publico (DTP), nos a compronde cu tipo di auto asina no ta ilegal pa uza como taxi. Theo Kock, director di DTP a splica cu “E tin cuater porta y mester zorg pa luggage di turista no muha etc den caso di awasero”. Mas leu e experto den transporte publico a sigura cu “E mester ta un motorvoertuig cu por uza pa transporte di hende. E taxista specifico aki ta uz’e tijdelijk te ora su piesa yega”.
Falta pa actualisa ley di transporte publico
DTP ta consciente cu e forma di transporte aki no ta ideal, pero si no tin ley cu ta prohihie, ta dificil strob’e. Mester menciona cu e taxista encuestion a acerca DTP adelanta pa pidi permiso pa uza e pickup mientras ta warda piesa nobo pa su van marca Toyota cu a haya problema cu su motor. Ta como cu e piesa ta tardando pa simannan largo caba, cu ciudadanonan ta topa cu e pickup aki cu number di Taxi riba caminda. Di otro banda, DTP dificilmente por baha e taxi for di caminda, stroband’e di gana su pan di cada dia pa cria su famia, pa motibo cu e agencia di auto no tin fin di trece su piesa p’e.
Right Hand Drive no ta permiti
Mirando cu ley ta permiti pa taxista transporta un pasahero den pickup, a probecha di puntra mesora si por uza auto RHD tambe pa e mesun tipo di transporte. Pasobra si e rekisito ta cu mester tin cuater porta y mester por move uzando un motor, anto RHD tambe lo mester por. Pero riba esey si Theo Kock a contesta mesora cu: “No, esey ta duidelijk cu no por!”
No ta prome biaha cu ta uza pickup como Taxi
Pero kedando riba e tema di uzo di pickup den transporte publico, a elabora cu si e pickup, por ehempel, tabatin solamente dos porta, e ora lo por a haci algo contra di dje. Ta bon pa enfatisa cu den pasado tabatin taxista cu a opta pa uza pickup caba y DTP no por a kita nan di caminda.
Pero pa aclaria e asunto, Theo Kock a bisa mesora, cu un bos serio y determina cu “Ami no ta pro esaki. Pero tanten den e ley ta papia di motorrijtuig y esaki no ser specifica, cosnan asina lo por pasa”. Pues, ta spera cu den e siguiente revision di ley di transporte publico, cu lo por elimina e opcion aki, den cuadro di brinda un servicio mas eleva na nos turistanan. Pero pa esaki, Gobierno di Aruba mester percura pa tin hustista den cas na DTP. Esaki no ta asina awo, loke ta masha lamentabel. Con un departamento cu ta emiti tanto permiso anualmente asina, no tin un hurista den su servicio.
Theo Kock ta na cabes di Departamento di Transporte Publico desde aña 2019 y ta nombta como director desde aña 2021. Prome cu esey el a traha ocho aña na Algemene Rekenkamer y un otro ocho aña na Direcie Financien y dos aña como Consehero di Minister.
Tin mas reto…vehiculonan cu number “O”
No ta pickup so ta un problema awendia den transporte publico. Por ehempel, ora a introduci e number “O”, cu ta para pa “Ongeregeld vervoer”, a pensa pa uzo di bus grandi. Pero cu tempo, e maneho a cambia y a permiti tur tipo di vehiculo cu e permiso aki. En bez di uz’e pa autonan luhoso, door di falta di ley, hasta autonan chikito Hyundai Accent ta core rond awendia cu number O. Eticamente no por pasobra ta prefera pa uza esaki pa transporte elite, pero pa falta di regulacion y ley, ki-cu-ta ta sosodiendo.
Taxi cu bentana habri sin airco
Mientras cu di un banda awendia ya cuestiona pickup comp taxista, ainda falta pa topa cu e taxinan cu bentana habri y turista tur soda sinta paden. Ora puntra dicon, pasobra no tin airco. Ora revisa e leynan den transporte publico, ningun caminda ta indica cu e auto mester tin un airco cu ta funciona. E ley ta menciona cu e mester ta un vehiculo di motor, cu cuater porta y mester ta dispone di un keuringskaart. Y pa keur auto no ta check si e airco ta funciona of no. Esaki tambe ta un punto pa bale la pena revisa ora actualisa ley di transporte publico.
Lo actualisa e ley awo
Si tur cos ta bon, e aña aki lo revisa henter e ley y discribi, di cada permiso, kico por haci cu ne, si y no. Pa ta duidelijk pa tur hende, tanto e vergunninghouder, cliente y hasta e propio toezichthouders di DTP, polis y instancianan manera aeropuerto y waf. Ta bon pa e dosnan aki tambe ta bon consciente di loke ta permiti of no. Por ehempel, algun tempo pasa waf tabata permiti vergunninghouder cu number “T“ transporta turista for di waf pa lama y bolbe. Esey no por! Ta conoci si cu tin ora ta yega barco cu 2000 pasahero y cu no tin suficiente taxi pa transporta tur pasahero. Pero waf no por dicidi riba nan mes y laga tour bus haci esaki. E consecuencia? Tourbusnan ta kere awo cu nan por haci beachshuttle.
Tocante DTP
Den pasado e departamento di transporte publico a cambia di diferente structura y nomber. Un tempo e tabata resorta bou di Cuerpo Policial Aruba. Pero for di DOPV, Minister Otmar Oduber a crea un departamento nobo na aña 2011 cu a bira Departamento di Transporte Publico (DTP). Awendia nan tin 32 empleado cu ta supervisa casi 7500 permiso di vehiculonan den transporte publico. Esaki ta encera mas o menos 6.000 permiso pa V-Wagen, 465 permiso di Taxi, 20 permiso di bus (cu ta vacante), 90 permiso di Autobus, 40 permiso pa Arubus, 380 vehiculo cu un “O vergunning” pa transporte conoci como “Ongeregeld Vervoer” y tambe 380 vehiculo cu un “T vergunning” pa opera un tour.
