Tata di victima di abuso sexual: Polis no kier tuma su keho

Tata di victima di abuso sexual a tuma accion den su man y a dicidi pa bay haci un denuncia na Kinder en Zedenpolitie, pero, el a haya un baño di awa friu.

Siman pasa diaranson a keda publica den medionan di comunicacion cu un hoben a bira victima di abuso sexual di menor. Ta trata aki di un persona cu tabata traha den Ibero American High School como IT Manager.

Esaki sigur a concerni nos comunidad masha hopi mes. Awe e tata ta cla pa bay duna su banda di medaya, cu el a bin entrega keho na KJZP den Wilhelminastraat. E tata a comenta cu hopi tristesa, cu polis a bis’e cu ta e mama so por haci denuncia y esey e ta condena.
Tambe el a comenta cu e y e director ta bon amigo, pero nunca a bis’e cu algo a pasa na e scol. Esey ta loke e ta lamenta. E no ta compronde pakico e no por a haci denuncia. E mama ta sigui cu e informacion y e tata no por a sigui cu nada. E no ta compronde kico ta pasando na Aruba.

E mucha a wordo abusa pa un homber. E mama no kier haci denuncia y parce cu segun e tata, e mama ta esun cu a encurasha tur cos.Apesar cu nan ta separa ya pa un tempo caba, e mama ta keda insisti cu e tata no tin mas derecho riba e mucha.E tata a menciona cu polis a bis’e cu e no por haci nada y ta e mama tin cu haci afspraak. Kico ta pasa na Aruba, e tata a bisa. Ta e mama so tin derecho? Ora cu un mucha wordo abusa, e tata no por haci nada? Polis a avis’e cu despues di dos luna, ningun hende a worry pa haci denuncia. Awo diripente tur hende kier haci denuncia. Despues cu e tata a cuminsa cu e accion, awo e mama ta bay haci denuncia, pero a base di afspraak.E tata ta haya cu e caso aki ta uno perdi. El a sali for di Aruba, pero no pa largo. Tur cos ta cla y e ta bin bek. Pero ta trata aki di algo grandi.

Tata ta disgusta

E tata a menciona cu e ta disgusta loke scol a haci. Pa un scol haci asina, no ta bon. Por a haci esaki cu un otro mucha tambe. E director no ta haciendo nada. Placa so no ta tur cos. Mester tene cuenta cu e derecho di mucha.

Voogdij

E mama y e tata tin voogdij riba e mucha. E tata ta mustra cu e ta duna alimentacion. Tur caminda cu e bay, e ta cumpra cos pa su yiu. E tata ta pensa cu voogdijraad, mester kita e mucha di e mama y hink’e den un luga safe pa e yiu.
E tata kier pa husticia actua y e kier tin tur derecho di e yiu y rapido. Pa colmo e conoce e IT manager pa hopi tempo. Sinembargo e no a spera cu algo asina a pasa cu su yiu, y pa un hende cu e conoce.
Ainda recherche, ningun hende no ta bisando nada. E ta sinti cu tur hende ta push’e un banda.