Tin un compania cu tin cuenta y rason di duna na Departamento di Transporte Publico (DTP) y na Departamento di Impuesto Aruba (DIMP), relaciona cu un practica cu taxistanan a descubri awe. E mesun compania ta core cu dos diferente auto, asigna pa transporte di turista for di un punto pa otro, uzando e number O. Pero, en bes di pidi dos permiso, ta pidi un solo permiso pero ta core cu ne riba dos auto diferente. Awe taxistanan a señala e dos autonan aki moviendo rond manera nada entre hotel y aeropuerto.
DTP a confirma cu varios keho a yega cerca nan awe y cu ta investigando e compania envolvi, cu lo mester responsabilisa pa e acto aki. Polis tambe ta pendiente pa topa cu e autonan aki riba caminda pasobra obviamente nan ta evadi belasting, ta burla di e permiso di transporte publico cu nan tin y como tal ta haci nan mesun mal ciudadano corporativo.
E permiso den transporte publico cu number O ta nifica “Ongeregeld Vervoer” y ta duna e compania e permiso pa transporte pasahero di un punto pa otro, basa riba un acuerdo adelanta cu e pasahero. Pues, contrario na un Taxi cu por para dilanti aeropuerto of hotel pa warda un trabou, esunnan cu ta stuur un auto cu number O mester haci e areglo adelanta cu e pasahero y ta busc’e y bah’e na e sitio acorda.
E acto aki awo lo hinca e compania den problema cu e permiso cu e tin awor den su poder. Door di burla di DTP publicamente asina, ta core e risico di perde e permisonan otorga na dje, debi na mal uzo di e plachi di number y evadi impuesto pasobra cada auto mester tin un number visibel riba dje y cada number mester paga anualmente na departamento di impuesto. Cu e compania aki ta uza dos auto cu un number, probablemente ta bisa cu e no tin seguro tampoco riba e autonan y turistanan ta core peliger cu si algo pasa cu nan den e auto, nan no ta cubri.
Si abo sa di mas caso na unda esnan cu ta core auto cu number O-T-TX of B, cu ta uza e mesun plachi di number riba mas di un auto, raporta mesora na polis y na Departamento di Transporte Publico (DTP) cu ta resorta bou di Minister Ursell Arends.
