Freddy Tromp, Fundado y Director di Fundacion Popcorn kende ta lidera un team di hoben den grupo di baile, unda na mes momento ta prove proyectonan pa desaroyo na hobennan atravez di plataforma “Dream, Dare, Do” ta contento di por a introduci su grupo di hobennan na e material di ‘Caracteristicanan cu ta yuda hobennan alcansa exito,’ duna pa Sra. Sharleen Tromp, Docente y Desaroyado di Identidad y Talento.
“Esaki ta yuda hobennan identifica nan personalidad y ami tambe como lider di e grupo identifica esun di mi mes y e manera con pa mi trata cu cada hoben segun nan personalidad pa logra resultadonan mayor pa e ekipo,” lider di Fundacion Popcorn a bisa.
“Ora nan a cuminsa splica e diferente personalidadnan mes ora mi por a identifica cierto di e hobennan y haya sa na cua personalidad nan ta pertenece. Awor en adilanti lo mi bay ta conciente ora di forma grupo pa traha riba cierto proyecto, di acuerdo nan personalidad pa nos por tin e miho balans.”
“Mi ta echt recomenda na cualkier otro organisacion, pasobra definitivamente si bo ta traha cu grupo sigur e ta un herment di bon pa aplica y compronde tambe pakico nan ta actua manera nan ta actua. Bo no ta scoge pa actua di cierto manera, e ta djis bo personalidad,” Sr. Tromp a bisa.
Ferghall Vlaun, studiante den V5 sa caba kico e kier bay studia na Hulanda. E ta conta cu e ta gusta siña y busca informacion y na mes momento siña otronan loke el a siña. Tambe, e ta gusta yuda hende. Dos caracteristica clave di su dos tipo di personalidadnan – ta progresivo y yuda otro. Vlaun kier bay studia ciencia biomedicinal como su prome escogencia, unda e lo aplica e caracteristicanan aki. “Mi lo bay studia malesa y investiga con mi por cura nan pa e ora dokternan haci uzo di e informacion ey pa yuda hende. Y asina pusha medicina un paso dilanti,” Vlaun a bisa.
Pero e material tambe a dun’e un comprondemento pa cu su relacionnan den cas. “Mi mama ta un hende cu ta para, pa con e ta mira e cosnan y ta traha hopi duro pa su logronan. Mi a compronde awe su manera di rasona ora cu e ta hala mi atencion na momento cu mi por ta haciendo algo cu no lo bay contribui na mi bienestar. Y door cu nos tur dos ta un tiki di e mesun personalidad, ta haci cu ami tambe ta para pa mi conviccionnan. Sinembargo nos personalidad secundario, un di su caracteristicanan ta cu nos ta ‘forgive and forget’ lihe, ta haci cu nos ta bira bon bek mes ora tambe,” Vlaun a conclui.
“E ‘small group’ di Dream, Dare, Do tabata un grupo hopi energetico. Mesora nan a secciona segun personalidad una bez esaki a keda identifica y nan mes por a reconoce e personalidad di otro miembronan den nan ekipo. El a forma un fundeshi basico, como punto di salida for di unda nan por sigui opera. E audiencia en general, di tur caminda cu nos a bay duna e lectura e audiencia tin manera un ‘Aha moment’ – un momento di asombro. Nan ta reconoce nan yiunan, nan casa of e situacion cu nan ta aden y con e material ta un inicio pa cuminsa yuda nan,” Docente Sharleen Tromp a bisa.
“Mi pasion ta echt pa yuda y wak con famianan ta wordo restaura, e relacion entre mayor y yiunan. Con yiunan ta cuminsa compronde nan mayor y e mayor nan yiu, ariba un diferente nivel. E hendenan ta ricibi’e cu hopi entusiasmo y nan ta hay’e hopi educativo. Nan ta keda puntra ki dia tin extra lectura pa nan trece otro miembro di nan famia. Nan ta reconoce berdad cu cada yiu ta diferente cu nan mester keda guiya nan pasobra nan ta futuro lidernan. Mi mes ta experiencia esaki cu hopi gozo y gran satisfaccion.” Sra. Sharleen Tromp a termina bisando.
