Autoridadnan Mericano a detene e trafico fronteriso diadomingo, den e cruzada concuri entre San Diego y Tijuana, mientras cu polis Mexicano tabata tuma medida contra un protesta di migrante Centroamericano conentra na e frontera cu tabata busca na solicita asilo na Merca.
E paso a wordo suspendi den ambos direccion na e puerto di entrada di San Ysidro, un di e mas di binti portanan di acceso mas transita entre ambos pais, segun e agencia di Douane y Proteccion Fronteriso di Merca, riba Twitter.
E presidente Mericano, Donald Trump, a mustra su descontento cu e caravana a medida cu n an tabata acercando su pais y a desplega efectivonan militar na e fronta pa apoya Patruya Fronteriso.
Trump a tweet diasabra cu e migrantenan na e frontera mester keda Mexico te ora cu nan solicitudnan di asilo wordo aproba individualmente den corte. Pero e gobierno entrante di Mexico a nenga cu lo a yega na un acuerdo.
Diadomingo, polis di Tijuana a disolve un protesta, provocando escenanan caotico di persona cu tabata core den diferente direccion, segun testigonan. Algun manifestante a anuncia cu nan tabata tin intension di cruza bay Merca, pero Reuters no por a verifica si nan a haci esaki.
Mientras tanto, oficialnan di Douane y di Patruya Fronteriso di Merca, a congrega na e banda Mericano den un demostracion di forsa.
Cada aña, miles di migrante di Honduras, El Salvador y Guatemala ta huy di e violencia y pobresa na cas en busca di e soño Americano na Merca.
Sin embargo, no ta tur ta logra yega e pais aki y hopi ta wordo extradita, mientras cu otronan ta keda na Mexico of ta perde nan bida durante e travesia largo y peligroso.
“Nan kier pa nos warda na Mexico pero al menos ami ya mi ta bon desespera. Mi yiu chikito ya ta malo, nos no tin ni pa su lechi,” Joseph Garcia, un migrante Hondureño di 32 aña ta lamenta.
“Ami kier traha, pero nan no a dunami e papelnan. Kico nan kier pami haci?”, el a agrega prome cu el a bisa cu e lo purba di crusa e frontera pa yega Merca.
Buscando un solucion
Andres Manuel Lopez Obrador, kende lo asumi presidencia di Mexico dia 1 di December, a bisa cu e lo busca elimina e causanan di migracion creando mas trabao y mehorando e condicionnan di bida na Mexico y America Central.
A cambio, e ta spera cu Trump y e gobierno di Canada acepta yuda na impulsa e desaroyo economico den e region.
Un grupo di e gobierno di transicion Mexicano, encabesa pa e proximo canciyer Marcelo Ebrard, ta discutiendo cu autoridadnan Mericano riba solucionnan pa e problema Migratorio.
“Nos ta hibando un dialogo hopi fluido y hopi respetuoso cu Merca (…) pasobra ta preocupa nos, di manera hopi special, cu na e momentonan aki un grupo importante di migrante ta acumula na e frontera,” Robert Velazco, vocero di Ebrard a bisa Reuters.
“E situacion aki no ta sostenibel pa Mexico, e ta hopi compleho. Esey ta loke mas ta preocupa nos. Tampoco e ta sostenibel pa e propio migrantenan. Cuanto tempo nan por pasa eynan?” Velazco a agrega. “(E plan) lo ta pa aplica den e proximo siman of lunanan, pero ainda nos no tin ningun solucion.”
E administracion Mexicano saliente tambe a ofrece beneficionan laboral, di salud y educacion na e migrantenan pa regularisa nan situacion atrabes di e programa “Estas en tu casa,” y su esfuersonan a ricibi respaldo di e sector priva.
