Algun boto di placer di Aruba a bay den fin di siman Venezuela pa participa den un actividad pa boto. Diadomingo nan mester a regresa bek, pero un di e botonan no a regresa. Confirmacion di ultimo ora tabata cu e boto a sali desde Venezuela direccion Aruba den oranan di mainta, pero p’un motibo of otro no a yega Aruba.
Shalick Clement, vocero di Kustwacht, a splica cu tin indicacion di un boto cu lo ta perdi y ta buscand’e. Ta buscando contacto cu Wardacosta di Venezuela riba e indicacion, kico esaki ta, si ta corecto of no. Pero, Wardacosta di Corsou a saca nan e helicopter, mientras cu Aruba a despacha helicopter di polis. Tambe Wardacosta a saca nan boto pa bay busca e boto aki cu tin abordo seis pa ocho persona.
Polis di Aruba a sali direccion frontera cu Venezuela pa mira si por topa e boto. Ta haci esey pa wak si nan por mira algo, pasobra riba radar no ta mira nada. Pero asina mes a opta pa saca un unidad unda cu por bay mira si ta haya algo.
Clement a confirma cu e boto ta di Aruba y ta di placer. Na Venezuela tabatin un actividad y esey a pone cu un grupo di boto a bay pa participa. Nan mester a regresa, pero no ta duidelijk unda un di e botonan ta. Kico ta e situacion y kico ta e indicacion ta loke Wardacosta ta bezig cu ne. Wardacosta ta atendiendo cu e caso door di sigui busca informacion si e boto ta perdi of a keda pega na Venezuela.
E vocero no a confirma na prome instante cu e boto ta perdi, pa motibo cu mester a verifica e informacionnan ricibi. Nan mester verifica kico ta pasando, sea ta perdi of ta na Venezuela. Un informacion cu el a ricibi ta cu e boto tabata tin problema di motor. El a expresa cu si nan tabatin problema cu motor, e ora nan no lo a sali desde Venezuela. Tabatin diferente sospecho y esey a pone cu nan no por a declara e boto perdi.
For di fuente fidedigno nos a haya informacion cu ta trata di e boto La Pandilla, cu tabatin problema di motor caba. Nos redaccion a haya confirmacion cu e boto tabata rumbo pa Aruba, unda cu otro botonan a pasa nan y tur cos tabata mustra na ordo. E noticia ta den desaroyo.
