Dia 4 di october awor Corte lo dicta sentencia den e caso cu Rocco Tjon a cuminsa contra e dos periodistanan Patrick Paskel y Speed Andrande. El a pidi rectificacion pa expresionnan, cu e ta bisa cu ta atacha su nomber, cu a haci den e programa Enfoke.
E tratamento a dura un ora y mey cu e dos periodistanan representa pa mr. David Kock y Rocco Tjon, kende no a presenta, tabatin e bufete Croes & Ruiz cu su representantenan.
En si e ta bisa cu loke e dos periodistanan a bisa no ta berdad, y no a prueba esaki tampoco. “Nan a zwaai den laira cu un papel pero a mustra kico esaki ta,” abogado mr. Ruiz a bisa hues.
Mr. David Kock di su banda tabata contento pa motibo cu e abogadonan di Tjon mes a manera pone cuminda riba mesa p’e. A presenta cu un documento cu a pidi Procurador General y den esaki a sali na cla cu e caso yama Juwana y cu a scucha Tjon a duna un declaracion na Landsrecherche, como testigo, pero mientras cu Tjon a bisa: Nunca mi tabata sospechoso ni testigo.
Tambe den e otro caso di su yiu e tabata un sospechoso pero despues a dicidi di seponeer e caso. Tur esaki ta poni preto riba blanco. “Ken ta gaña,” Speed Andrade y Patrick Paskel a puntra pafo di Corte.
Mr. Ruiz a trece punto dilanti riba e hecho di con no a haci pregunta prome cu a tira cos den laira di e forma ey. Pero su contrincante mr. Kock a bisa cu berdad esey por haci, pero no tur ora ta un exigencia. A mustra cu den e caso aki a puntra e mandatario cada bes riba su rol, y na momento cu a contesta, a informa di esaki tambe den e noticiero.
Riba dje, Tjon no ta papia cu 24ora.com, no ta honra peticion pa entrevista, y no por obligue tampoco.
Na final, lo conoce mas di e decision dia 4 di october awo, un indicacion cu e caso aki no t’asina urgente e filosofia di un caso sumario ta.
