Diamars atardi a tuma luga un conferencia di prensa special na Ser’i Noka na unda tabata presente Minister Marisol Lopez Tromp, Minister Chris Romero y Prome Minister Evelyn Wever, unda a anuncia e acuerdo cu a yega na dje pa promove practica di agricultura na Aruba.
Durante e temporada di cierre di frontera cu hopi hende tabata na cas, a lanta hopi e interes pa planta mata, principalmente di berdura. Minister Marisol Lopez Tromp den su conferencia di prensa su team a traha duro pa finalisa y promove un maneho na fabor di agricultura.
A haci tur e preparacion pa tin algun tereno pa wordo otorga na huurgrond cu ta promove e maneho ariba menciona. A logra keda cla pa otorga 19 tereno y awe den forma simbolico a haci traspaso di e tereno aki.
Prome a hiba palabra Prome Minister Wever Croes, kende a papia di e temporada dificil y e maneho cu ta hibando pa promove e programa di Gobernacion, percura pa stimula agricultura y ta haci esaki door di introduci un prijs hopi special pa awa, cu ta escencial den practica di agricultura. Cu cooperacion di WEB a logra yega na un tarifa di Afl. 5,50 pa kub. Antes e tabata 9,50 florin.
Minister Marisol Lopez Tromp a papia di su experencia bishitando cunucunan pa scucha e dolor di e agricultornan y nan necesidad pa tin mas tereno di huur pa planta. E intencion ta cu e sector aki ta bira uno mas grandi, no solamente bou di e grandinan pero pa envolvi e hobennan (no solamente como hobby pero den un forma mas structural).
