SV Britannia ta un organisacion serio cu na october awor ta cumpli 65 aña di existencia y tabata promovi pa division Honor na aña 2001. For di e tempo ey nunca mas a baha di division Honor.
SV Britannia y manera ta yama nan “E PUMANAN DI PIEDRA PLAT”, ta un di e organisacionnan cu tin tur e divisionnan di AVB cuminsando na e categoria di U-5 te cu Division Honor, division Veterano di 35+, U-17 Damas y Open class Damas. E meta di SV Britannia semper tabata pa crea lidernan pa nos comunidad y esey nos ta bin ta haciendo.
Tin biaha den bida ta pasa incidente cu no ta positivo, pero pa SV Britannia e logronan positivo ta mucho hopi pa menciona. Ora e incidentenan negativo sosode, SV Britannia sa di tuma medida pa trata di evita pa nan no sosode atrobe. Den e caso specifico aki, den e ultimo wega entre Dakota y SV Britannia di play-off 2022/23, head coach di SV Britannia y tres hungado a comporta nan mes anti deportivo y a viola e reglanan di e organisacion- y articulonan di strafbepalingen di AVB. Despues cu comision di castigo a scucha e coach, e hungadonan concerni y referee, SV Britannia a ricibi for di e comision di castigo/AVB e decision di e cuater personanan, unda cu tur cuater a ricibi castigo.
Directiva di SV Britannia ta pidi disculpa na tur nos miembronan, fanaticonan, sponsornan, AVB, referee, comision di referee y na mundo di futbol en general pa locual a sosode e dia concerni. Directiva ta condena e comportacion di head coach y e hungadonan. E head coach di SV Britannia a tuma su retiro y a schors e hungadonan miembro p’e tipo di mal comportacion aki.
SV Britannia lo sigui traha ariba bienestar di tur su miembronan pa un miho hende den nos comunidad. Tambe nos por bisa cu SV Britannia tabata tin un aña exitoso unda cu nos a titula campeon Copa Betico, Campeon Caya 6 y pa diferencia di un gol nos no a hunga final. Tambe nos por informa cu SV Britannia ta preparando bon pa Campeonato 2023/24 cu mundo di futbol keda pendiente di nos organisacion.
