Diabierna ultimo SV Atletico Santa Fe a batisa nan uniform di U7-U11 y tambe esun di Division 1, unda cu minister di deporte y enseñansa, Endy Croes a haci acto di presencia, hunto cu mayor di e muchanan.
SV Santa Fe ta existi caba pa 70 aña den Aruba su futbol. Tin mucha di U7 te cu U11 y tambe di U15 te cu division 1, cu ta prome biaha cu tin e division aki segun presidente SV Santa Fe, Michella Steenvoorde-Lacle.
Ta sigui conta cu loke e muchanan ta hopi orguyoso di dje di e hecho cu e campeonato pasa a hiba e titulo di campeon pa U20 y U15 a bay cu e titulo di subcampeon.
E muchanan ta den full training. Tambe U11 y U13 ta e divisionnan cu nan lo tin cu traha pa futuro. Tambe tin cu traha riba nan veld mirando cu nan no tin luz. Tur loke ta e divisionnan grandi, manera U20 y division 1, tin cu train riba veld cu luz, ya cu mayoria ta mayor di edad cu trabao, etc.
Esey ta pone un presion riba nan presupuesto ya cu tin cu huur veld pa nan por train. Tambe e team ta orguyoso di por duna un contribucion na nan coachnan, pa e ora nan bin cu entusiasmo y tambe p’e muchanan hunga cu entusiasmo unda nan por desaroya nan tecnicanan.
Steenvoorde-Lacle a splica tambe cu tin un reorganisacion di nan directiva. Recientemente el a tuma encargo di presidente. Nan plannan ta hopi ambicioso. Nan kier turf y luz riba nan veld. Awo nan ta bay busca sponsor pa por completa e soño aki.
Directiva di SV Santa Fe ta consisti di entre otro Ted Johnson como vice-presidente y lo ta enfoca riba e desaroyo di e club.
Tambe ta haya Daisy Johnson, kende ta encarga cu e tecnica y por bisa cu ta encarga cu e coachnan. Eva Wever ta haci nan relacionnan publico. Sue Wong ta tesorero y Olivier Vieira, kende ta forma e team d hunta directiva di Santa Fe.
Por ultimo Steenvoord-Lacle a comenta cu hunto cu e mayornan lo logra hopi. Si nan ta envolvi den e deporte di nan yiu na un manera sano y e ora ey e yiunan ta kere y crea disciplina, crea autoestima y tambe siña cu no tur ora por gana.
Toch e ta hopi bon pa keda sportief y keda cu e metanan y lucha te ora cu yega na cumpli cu e meta cu bo kier.
