Un grupo di studiante di Colegio EPI ta activo cu nan proyecto final pa termina nan estudio. Nan proyecto ta encera pa yuda un stichting cumpli nan meta. Despues di un estudio profundo a dicidi pa yuda Stichting Santa’s Cause Aruba.
Nan meta ta pa recauda 4 mil florin pa duna e stichting kende na nan turno lo yuda mucha cu regalo di Pasco. E grupo di studiante a percura pa un video promocional caminda a invita e comunidad pa adopta un mucha cu AWG 60,-. A ricibi masha bon reaccion di comunidad.
Pero debi cu tabatin persona cu no a logra haci e transferencia bancario, a dicidi di organisa un evento pa asina por pasa y haci nan donacion di un forma efectivo. Nan ta na Centro di Bario Playa Pabou te cu 11:00 awe diadomingo, pasa y yuda e grupo di studiante logra nan meta pa termina nan proyecto y nan estudio cu exito.
Tocante Stichting Santa’s Cause Aruba
Camille Arends y un team di hoben a funda Stichting Santa’s Cause Aruba (SCA) na aña 2018 cu meta pa haci e mucha cu mas necesidad su Pasco, feliz. Manera indica, tur aña SCA ta yuda 850 mucha cu regalo di Pasco. Nan ta activo no solamente cu e proyecto di Pasco sino e aña aki tambe a yuda cu tas di scol p’e muchannan cu tabatin mas necesidad p’e. Nan ta traha hunto cu diferente organisacion social na Aruba, pa cual nan tin un miho bista ken realmente ta esunnan cu ta den necesidad. SCA ta consisti di un grupo di boluntario, bou guia di Camile Arends como presidente, Marisol Sanchez-Maldonado como tesorero y Stephany Geerman-Maduro como secretario.
