Tabata algun luna pasa cu nos a raporta cu Stichting Ja Ik Aruba, un fundacion dedica na yuda nos hobennan, a bini cu un programa pa drop-outs di scol cu no tin trabao. E programa yama In The Picture, unda hobennan di 18-28 aña ta haya oportunidad pa siña logra nan metanan, bay bek scol pa caba cu ne of pa haya un trabao, y tambe algun conocemento pa si nan kier lanta nan propio negoshi.
E president di e fundacion a haya un email algun siman atras for di oficina di gobernador, un invitacion oficial pa bin presenta y splica kico tur nan ta bezig cu ne. A papia cu Su Excelencia Gobernador di Aruba, Alfonso Boekhoudt tocante e programa In The Picture y con nan ta yudando hoben, hobennan adulto, con ta guiando esunnan cu a dropouts di scol pa yuda nan participa den comunidad socialmente y laboralmente. “Nos a splica nan den detaye con nos ta yuda pa e talento cu nan tin.”
E invitacion tabata uno hopi bunita mes pa e fundacion cu ta bezig cinco aña yudando hoben riba nos isla. E invitacion aki sigur ta marca un punto grandi den e trayectorio di e fundacion aki pa sigui haci loke nan ta haci pa comunidad.
Gobernador a puntra cierto cosnan tocante dropouts y den esaki con ta trata cu e programa pa yuda nan. E fundacion a acerca varios compania y hoben cu pa algun of otro motibo tabata den proceso pa sea termina opleiding sin cu a caba esaki, of cu no a caba scol mes.”Nos a bisa cu nos tin cu haci algo preventivo tocante esaki, cual tabata sumamente exitoso,” segun Ebby Schwengle, President di Stichting Ja Ik Aruba.
Di e forma aki via un programa asina, hobennan ta haya un impresion di con procesonan laboral ta na e companianan cu nan ta bishita. Nan ta haya inspiracion y na mes momento pa medio di e concepto aki nan ta haya un guia pa ahusta nan comportacion y asina haci match-making den e proceso laboral mas optimal posibel.
PROGRAMA TA GRATIS, PERO MESTER DEDICACION!
E programa In The Picture a bini cu un otro oportunidad awor y net e siman aki pa e bentana cera. Nan ta buscando hoben ainda entre 18-28 aña cu no tin trabao of scol, bo por tin un side-job, esey no ta un problema. “Please acerca nos, esaki ta un oportunidad cu bo no kier perde,” segun Antonia. E programa ta siña bo con pa lidera bo mes, bo ta haya training y coaching den cosnan cu bo mester di dje den bida. E ta gratis, bo no mester paga niun florin.
Pero esun cu ta interesa y kier compromete na esaki, mester ta dedica na e programa for di curason y enfoca pa yega na exito. Por yama libremente riba 699-2242.
