Dia 26 di juni ta Dia Internacional Contra Traficacion Ilicito y Abuso di Droga y en conexion cu esaki Stichting Hunto ta organisa otro siman tres dia di lezing y caminata. Cada dia di lezing ta enfoca riba cierto grupo y e anochinan aki ta trata diferente topico.
Michelle Lont, Trahado Social di Stichting HUNTO, a indica e dianan di lezing y caminata ta pa nan para keto un rato riba e Dia Internacional Contra Traficacion Ilicito y Abuso di Droga. Ta cuminsa cu tres dia di lezing cual ta tuma luga riba e dianan 19, 20 y 23 di juni.
Dia 19 di juni Stichting HUNTO ta invita e famianan di e clientenan cu ta den Centro Colorado, pero tambe tur famia cu tin un persona cu ta den adiccion of ta sufri di cualkier adiccion, pero tambe persona cu ta bisa di tin famia cu a caba di sali di centro of caba di bin cualkier centro di rehabilitacion y meste e guia aki como sosten.
El a sigui splica cu e dia ey nan t’ey pa brinda tips y haci n’e proceso pa reconoce ki ora un persona tin adiccion. Tambe ta brinda tips riba kico pa haci cu e persona cu ta den recuperacion. Dia 20 di juni ta p’e hulpverleners, unda lo papia riba protocol, unda mester referi un persona y e clientenan cu trastorno di salud mental.
Dia 23 di juni ta trece informacion general pa Aruba. E dia aki ta papia riba e instancianan cu por acudi na nan, salud mental y adiccion. Segun Lont, e dia aki tanto hoben como mayor por presenta, pasobra nan no ta enfoca riba e edad. E lezingnan ta tuma luga na Centro di Teresita di 6:00 pm pa 8:00 pm.
Nelisabel Angela, Coordinado di Actividad di Centro Colorado, a splica cu e caminata ta tuma luga dia 25 di juni pa 6:00 am. E mainta aki ta cuminsa c’un zumba y despues ta cuminsa e caminata. Na final nan ta saca ganado di premionan. Pa por participa den premio, mester cumpra ticket cual ta costa dies florin.
Angela a indica pa por participa, nan ta pidi pa haci e pago cash. Por paga n’e localidadnan di IBiSA, Centro Colorado of F.A.D.A. desde 8:00 am te 4:00 pm. E ticket ta bay den tombola.
E caminata ta un distancia di cinco kilometer y ta un fun walk. Esun cu ta desea di core por haci esey tambe. E mainta aki diferente profesional ta bay t’ey y lo yuda parti di awa, fruta, saca potret. Na distancia di 2.5 kilometer nan ta bay tin un post di awa. Incluso durante e ruta ta bay tin profesional pa guia y yuda esunnan cu mester.
Pa participa no tin limitacion di edad. Nan a saca shen ticket y ta spera di haya e cantidad di persona. Si sur pasa, segun Angela, nan por habri luga pa mas hende. Stichting HUNTO y Centro Colorado ta invita comunidad di Aruba pa participa n’e actividad aki.
