Sindicato Trahadonan di Aruba (STA) y su presidente Diego de Cuba, a keda sorprendi pa e decision tuma door di hues den caso di reduccion di salario di trahadonan di WEB cu 12.6%. Sinembargo lesando e sentencia, e ta conclui cu a bay hopi profundo den e tema y Corte a dicidi pa scoge pa e situacion general di Aruba.
E sindicalista den su declaracion duna ta bisa cu nan a keda sorprendi cu gerencia a bay pa e banda di WEB Aruba N.V. El a bay analisa e sentencia, cu tabata uno di basta pagina, el a conclui cu Corte a profundisa su mes riba e situacion general di pais Aruba. Entre otro a menciona tur e situacion precario na Aruba, di e hendenan sin trabou of cu mester di ayudo, con Cruz Cora mester yuda cu cuminda, pero tambe e presion di Hulanda pa Aruba por haya e ayudo financiero. “Basa riba e situacion reinante, hues a bay e banda di gerencia.”
Pero tambe a tuma nota cu den e ultimo alinea e ta bisa cu partidonan mester bay mesa pa negocia con ta bay atende cu e 12.6%. STA ta kere cu ta keda na e partidonan pa sinta na mesa pa mira si ta lague manera e ta, of ta bin cu otro protocol. “Nos ta compronde cu esaki ta un golpi duro toch pa e clase trahado, principalmente esnan cu ta traha den NV of Sui Generis di gobierno.”
Partido por apela e sentencia, pero mirando e hecho cu Corte a bay hopi detaye di e motibo di nan decision, “no a chup’e for di nan dede y e situacion na Aruba no ta di canta macamba, a duna rason pa retene e 12.6%. Mi ta sinti cu hues ta bisa cu si tabata di acuerdo cu ne aña di con awo no. Pero pa nos ta e forma con a impone esaki, no tabata e miho forma. Pero atrobe hues ta bisa cu e sentencia aki, cu no tin nada den caminda pa e partidonan sinta y negocia riba con ta bay kita e 12.6%. Pero locual ta molestia nos ta: Pa cuanto tempo,” e sindicalista a bisa.
