Sindicato STA a reuni cu minister Dangui Oduber unda cu a atende e punto di Aruba Airport Authority NV, apesar cu e mandatario ta sumamente druk cu turismo y salubridad publico. Diego de Cuba, presidente di e sindicato, a indica cu pa chiripa nan a haya e reunion cu e mandatario, mirando cu net riba e mesun dia, esta diahuebs, nan lo tabata tin e caso cu AAA NV den corte.
Pero e abogado di e compania tabatin un kebrante di salud y hues a pospone e caso pa dia 17 di maart. E kortgeding ta continua su caminda, segun de Cuba. E reunion cu minister a bin na un bon ora, unda cu e sindicato a trece nan inkietudnan dilanti. Ta bringando pa un bonus di pasco cu nan no a paga aña pasa, caminda cu AAA NV a kit’eabruptamente sin consulta cu sindicato STA.
Segun de Cuba, tin 143 CAO’er na aeropuerto. Tin cinco departamento operacional, di cual 117 trahado, cu ta cay bao di CAO ta traha den e departamentonan aki y cu sindicato STA ta representa. Si AAA NV no ta mustra respet p’esey, e ora ey nan ta fout bezig, segun de Cuba. Si e departamentonan operacional na aeropuerto dicidi di bay plat, e aeropuerto ta bay plat di berdad. Turismo ta e unico pilar te awor aki, segun de Cuba, caminda cu nan no kier haci cos descabeya.
P’esey a reuni cu e minister, splicando e wega cu gerencia di AAA NV ta bin ta hungando den e ultimo lunanan aki cu e kerstbonus cu nan no kier paga y negosha den e contrato colectivo. Nan kier extend’e pa dos aña, pero den e mesun rosea no kier page. Sino kier mar’e na algo cu ta condena e sindicato den e contracto colectivo nobo, unda cu e sindicato a bisa no.
E contracto colectivo ta extendi cu dos aña manera cu e ta, pero cu algun cambio chikito. Loke ta bashipremie, vakantieuitkering y kerstbonus ta tres componente sagrado den e CAO cu no ta mishi cu ne. A ripara cu e director no kier tende nada. E ta busca tur manera organisa sesionnan pa brainwash e trahadonan di aeropuerto, cual segun de Cuba, ta algo di condena. E director tin cu adapta su mes na e cultura di Aruba. Sa cu e pais ta den un pandemia y den un crisis. No por torno den e contracto colectivo cu ta 25 aña largo a keda traha poco poco riba y yega na dje.
AAA NV ta e unico compania estatal na Aruba cu a bay den un reorganisacion asina masivo. Te cu aworaki, 50 hende a tuma e pakete voluntario y ta 9 persona ta manda e aeropuerto corte dia 17.
