Dia 8 di april proximo lo tin un eclipse solar cu lastimamente no lo ta visibel na Aruba, pero si na Merca. E lo cuminsa na Mexico, pasa over di Merca y caba na Canada. Na Aruba mes e lo ta visibel pa 2% na unda un team di Space & Nature Aruba Foundation lo purba zoom in pa mira e seronan di e luna. Si bo tin e brilnan cu e Fundacion a bende ultimamente bo por wak e parti eynan, y tur esaki lo cuminsa cuarto pa tres di atardi, y binti pasa di tres e lo ta mas o menos pero no lo mira mucho di dje.
“Nos lo purba saca potret di e contour di e luna cu telescop, esaki ta sumamente peligroso si bo no haci e cu ekiponan corecto. E suplica grandi lo ta pa no purba di bay wak e cu telescop. Si bo kier wak e cu bril lo por, pero no lo ta mucho cos pa mira,” segun Jeremio Maduro di Space & Nature Aruba Foundation.
E fundacion tin dos colega cu lo ta bayendo Merca, den estado di Texas, cual a scoge e area aki pasobra dependiendo di e tempo lo ta pa nan sa precisamente den ki direccion nan lo bay unda e tempo lo ta mas miho. E idea principal ta pa purba Live Stream esaki pa Aruba anto ser conoci cu hendenan cu ta den e ramo akinan di astronomia.
Nan tin basta networking internacional caba segun Maduro, nan ta forma parti di International Astronomical Union caminda cu nan ta un delegado di nan, tin coleganan tambe parti di e team di Dark Sky Association, dus varios organisacion internacional cu nan ta miembro di dje.
Space & Nature Aruba Foundation ta un organisacion di educacion y ta haci mas tanto private star gazing, si bo kier un lectura priva tambe ta haci esaki, y nan ta yuda tambe cu muchanan cu tin experimento di Natuurkunde cu tin di haber cu astronomia. Por tuma contacto cu nan via nan Facebook page riba Space And Nature Aruba Foundation of via e-mail na [email protected].
