Fraccion Accion21 a conduci un sondeo e aña aki, haci por medio di tercer partidonan, cu e obhetivo di conoce y compronde opinion publico. E partido ta uza estudionan cientifico cu un margen di eror di 2,5% pa determina kico pueblo di Aruba ta pensa riba topiconan economico, politico y social. Tanto na 2021 y 2022 Accion21 a encarga un compania respeta na Latino America pa haci sondeo caminda ta percura pa haya contesta di tur bario, edad, genero, nivel di enseñansa, etc. den margen di distribucion nacional segun ultimo censo pa compronde opinion publico miho.
E perspectiva di pueblo riba diferente materia importante y unda nan ta mira problemanan ta e base cu e partido ta uza pa desaroya su plan di partido, ponencianan y solucionnan. E sondeonan a wordo haci a base di resultadonan di participacion anonimo.
E remionan REED Latino ta e premio mas importante di e industria di comunicacion y mercadeo politico na Latino America. E ta wordo organisa pa e revista “Campaigns & Elections” na Spaño. Trabaonan di Latino America y Caribe incluyendo Brasil, mercadonan Hispano na Merca y di Spaña por ser someti pa wordo considera pa nominacion. Campañanan electoral, publicacionnan, tesis di comunicacion politico y mercadeo publico y gubernamental cu a tuma lugar durante e periodo entre 10 di juli 2021 te cu 13 di augustus 2022 por keda nomina.
E aña aki e premionan lo wordo otorga na Panama, unda cu e encuesta digital y nanotargeting encarga pa Accion21 y conduci na Aruba a wordo nomina den e categoria di “Mejor trabajo de investigación socio demoscópico a través de nuevas tecnologías”. E ganadonan lo wordo anuncia durante celebracion REED Latino Awards 2022 dia 11 y 12 di november na Hotel La Compania Panama.
“E ta un honor cu nos sondeo a wordo nomina pa e premionan aki. Nos a deposita nos confiansa den un compania profesional pa conduci e investigacion cu a yuda nos compronde e percepcion di pueblo di Aruba den diferente aspecto, mediante procesonan cientifico cu ta respalda e validez y resultadonan di e sondeo. Nos ta hopi orguyoso cu algo innovativo sosodiendo den politica na Aruba ta haya reconocimento internacional. Accion21 ta extende un pabien na nos colaboradonan y nos ta desea nan hopi exito ariba e anochi final”, asina Parlamentario y Lider di Partido Accion21, Miguel Mansur a declara.
Mester menciona cu tin cuater nominado pa e mesun premio aki. Nan ta Atlas digital Cesar Verastegui / Tamaulipas na Mexico, uzando e compania Sonar. Tambe tin encuesta digital y nanotargeting haci pa partido Accion21 na Aruba, via e compania Altica. Ta nomina ‘Social Listening Juan Orlando Hernandez’ di Honduras via e compania Sonar y tambe ‘Capisci’ durante e campaña presidencial na Colombia, di e agencia Ojiva.
Pa mas detaye di e encuesta, bishita www.accion21.com of tuma contacto via e pagina di Facebook www.facebook.com/accion21aruba, +297 699-4095 of [email protected] pa cualkier pregunta of comentario. Pa mas informacion tocante e premio aki, por bishita www.reedlatino.com.
