Den e ultimo añanan nos por a wak cierto desaroyonan negativo cu ta tumando luga bao di nos muchanan na nos scolnan. Tin mas bringamento, bullying, termento y violencia ta tumando lugar. Hasta arma blanco y revolver ta envolvi den algun caso reciente. Esaki no ta djis alarmante pa nos yiunan cu ta bayendo scol, pero sigur tambe pa e mayornan y maestronan.
P’esey e ta importante pa nos como mayornan tuma tempo constantemente cu nos yiunan pa educa nan y siña nan pa keda leu di violencia. Nos mester siñanan pa nunca intimida y abusa otro muchanan, bao di ningun circumstancia. Nos por a wak e trend di violencia aki manifesta hopi tempo caba na Merca, unda cu tin hopi problema cu bringamento y tiramento na scolnan y shopping malls. Mirando cu e desaroyo aki na Aruba a escala riba un nivel cu sigur no ta acceptabel, nos mester cuminsa actua prome cu ta laat y cosnan mas grave sosode na nos scolnan. Nos no por ta negligente y pensa cu nada no lo pasa. Mundo ta cambiando rapido y nos tur, como un comunidad chikito mester aporta nos granito di arena pa nos por wak un cambio radical den e comportacion di nos muchanan.
Den cuadro di esaki, e ta importante pa wak e diferente recurso y accion cu nos por tuma pa cambia e rumbo di violencia cu kier apodera di nos scolnan. E problema no ta di awo, pero mi ta kere nos ta na tempo pa tuma accionan preventivo pa caba cu e circulo di violencia aki.
𝑺𝒐𝒍𝒖𝒄𝒊𝒐𝒏 𝒓𝒊𝒃𝒂 𝒏𝒊𝒗𝒆𝒍 𝒅𝒊 𝒄𝒂𝒔
Pesey, mayornan, ban educa nos yiunan pa nan ta muchanan responsabel, y siñanan e consecuencianan cu violencia por tin pa nan mesun bida y bida di otronan. Violencia por destrui nan educacion, bida y futuro. E ta imperativo pa siña nos muchanan etica y amor pa otronan. Sinta na mesa cu bo yiunan pa inculca principio y balor halto den e moral di nos yiunan, pa asina nan por lanta como ciudadanonan ehemplar y respetuoso. Esaki no ta e trabao di e maestronan so, sino primordialmente di nos como mayor!
𝑺𝒐𝒍𝒖𝒄𝒊𝒐𝒏 𝒓𝒊𝒃𝒂 𝒏𝒊𝒗𝒆𝒍 𝒅𝒊 𝒔𝒄𝒐𝒍
Scolnan lo por invita fundacionnan cu por educa nos muchanan na scol encontra di violencia y bullying, manera Telefon pa Hubentud cu ta basta activo den e area aki. Esaki lo trece conscientisacion na nos muchanan cu ta wordo exponi na asina hopi noticia, influencia violento riba internet, television y ehempel di mal amigo. Prevencion ta un gran parti di e solucion. Por a wak un reduccion significativo di violencia, ora a presenta un programa anti-bullying na algun scolnan den pasado. Lo ta bon pa sigui envolve e fundacion aki pa ta parti di e programa di e scolnan pa asina yuda nos muchanan compronde e problema y efectonan di bullying. A compronde tambe for di Minister di enseñansa Endy Croes, cu e ta preparando mas proyecto cu stakeholders pa duna mas atencion den scolnan riba e tema aki.
𝑺𝒐𝒍𝒖𝒄𝒊𝒐𝒏 𝒓𝒊𝒃𝒂 𝒏𝒊𝒗𝒆𝒍 𝒅𝒊 𝑮𝒐𝒃𝒊𝒆𝒓𝒏𝒐
Adicionalmente, scolnan por wordo ekipa cu tecnologianan pa evita armanan drenta na scol. Detectornan di metal special por wordo instala na entrada di nos scolnan. Cu tur loke a sucede ultimamente, esaki sigur mester wordo considera como un opcion serio y realistico. Tin diferente opcion y solucion pa e problematica aki. Laga nos ta proactivo y proteha nos muchanan y maestronan di un proximo episodio di violencia.
