Segun Parlamentario Mervin Wyatt-Ras, mientras sector di cuido ta ser confronta cu cortamento di 60 miyon pa culpa di Evelyn Wever-Croes y nos pueblo tin cu bay paga eigenbijdrage na specialista, botica, laboratorio, Spoed Eisende Hulp y na Huisartsen Post, gobierno tin e luho di permiti fraude den DVG y prome minister ta malusa e ley di integridad pa tapa cos.
Esaki ta bin na cla den contestanan di Evelyn Wever-Croes na e miembronan di Parlamento mr. drs. Arthur Dowers, mr. Gerlien Croes y drs. Wyatt-Ras. Despues di dos ronde di total 66 pregunta di Wyatt-Ras na Dangui Oduber encuanto e fraude na DVG y hortamento di placa cu turistanan ta paga pa test na aeropuerto y e preguntanan di Gerlien Croes na e minister encarga cu economia, tres parlamentario di fraccion di AVP a dirigi pregunta dia 22 di februari 2022 na e persona cu ta encarga cu integridad di pais Aruba, esta Evelyn Wever-Croes.
E pregunta dirigi na e mandatario tabata si den e investigacion di falsificacion di certificadonan di vacuna e minster encarga cu salubridad y turismo ta ser investiga penalmente. Segun Wever-Croes, minister Dangui Oduber no ta ser investiga penalmente. Segun e prome minister e investigacion di falisificacion di pruebanan di vacuna ta dirigi riba ex-contractanten di DVG. Segun Wyatt-Ras ta hopi raro cu e minister en cuestion no ta ser investiga paso tin entendi cu e sospechosonan ta su campañadornan cerca y cu el a pone man riba nan cabes.
Segun e minister encarga awor parcialmente cu integridad e investigacion ainda no a finalisa y recientemente tabatin algun detencion. E ta desmenti cu tin entre 3000-4000 certificado falsifica.
Pa loke ta trata e ley di integridad di ministers cu a ser aproba den Parlamento no mucho tempo pasa, esta dia 25 october 2021, por bisa cu en bista cu e fraude a ser haya de luna di october e minister mester por a notifica minister-president di e hecho aki. Staten a aproba credencial di gobernantenan dia 17 di september. Si un luna despues fraude ta ser descubri mester a notifica esaki na e prome minister y mester a considera stapnan.
Den caso esaki no ta posibel paso segun Wever-Croes articulo 2, 13 ni 16 no por ser aplica den e caso cu minister Dangui mester duna cuenta. Kiermeen cu e ley aki por ser tira den bar’i sushi. Den e ley aki tampoco ta inclui esnan cu ta yega na ministernan den forma di friends and family. Pues prome cu zwaai cu e ley aki como salbador di integridad mester wak e bon con e ta salba actual gobernantenan di MEP y RAIZ.
Wyatt-Ras ta lamenta profundo cu tanto placa asina ta ser malversa cu e fraude aki mientras cu tin cu bay saca placa fo’i cartera di ciudadanonan pa un eigen bijdrage pa cuido y pa bay paga pa remedinan no ta den e positieve lijst y no lo ser cubri mas.
Pa cu esaki Parlamento a ricibi un carta di stakeholders den cuido fecha dia 11 di februari 2022, manera ABV, Vereniging di Boticarionan, Respaldo, HAVA, ImSan, Vereniging Medische Specialisten Ziekenhuis Aruba, Sticghting Ziekenverpleging Aruba, VMSA, Vereniging Private Laboratoria Aruba, Vereniging van Apothekers Aruba.
Den carta nan ta mustra nan preocupacion y nan preguntanan rond di introduccion di eigenbijdrage entrante 1 di april 2022. E sector di cuido no a ser envolvi den tal decision.
Segun e stakeholders e forma di e eigenbijdrage lo trece division entre pashentnan y lo crea klassezorg. Ora di cobra esaki lo trece risico di fraude y por trece emocion y hasta violencia ora persona no por paga. Ta necesario tambe cu tin persona pa cobra, swipemachine, sistema di kassa y kluis pa warda placa, bon administracion y control.
E consecuencia lo ta pa e pashent cu si e no tin suficiente placa den su cartera e no por bay un specialista mas, e no por busca remedi na botica, ni bay haci test y si e bira malo den anochi en no por bay Spoedeisende Hulp of Huisartsen Post.
Di importancia ta keda cu cuido mester ta accesibel pa tur hende y cu tur ciudadano tin derecho riba cuido. Fraccion di AVP a base di e carta aki a dirigi un carta na parlamento pa scucha e stakeholders sinembargo te ainda e reunion aki no a tuma luga. Mientrastanto di otro banda e mesun minister si por permiti su friends and family horta placa na aeropuerto di testnan y ricibi cantidad di placa pa vacunanan falsifica.
