Manera por corda, diamars RdA a firma un Letter of Intent cu dos posibel candidato pa apertura di e refineria. Esaki ta algo cu San Nicolas Business Association a sigui di cerca, mescos cu e proyecto hotelero na Seroe Colorado.
Andres Hernandez, presidente di San Nicolas Business Association, a comenta cu tin hopi cos andando aworaki. Nan a reuni cu RDA e mainta prome cu e firmamento. SNBA a bay hopi bon prepara pa haci preguntanan cu tabata tin di haber cu e refineria.
A bay riba diferente tema, por ehempel terenonan, desaroyonan positivo cu tin awor aki cu tin mester di tereno. Y tambe e documento firma, esta e Letter of Intent. SNBA a bay cu mente habri pa scucha tur cos. Den e caso di refineria, e asociacion tin su expertonan cu a bin ta dunando nan conseho di e proceso andando riba e facilidadnan di e refineria.
E impresion cu el a haya te aworaki ta cu e caminda cu ta canando, ta mustra bon. Mas ainda pasobra el a scucha cu e candidatonan cu a pasa pa e ronda di negociacion, esta Quanten y Eagle LGN, tin apoyo di Merca “cu ta mustra con serio nan ta”.
El a comenta cu e grupo ta un grupo hopi conoci den mundo, aunke tur ta di acuerdo cu no exactamente den e area petrolero. Pero e ta un grupo cu a haci cosnan bira realidad.
Hopi hende ta di opinion cu e refineria ta obsoleto, cu mester haci hopi trabou riba dje y kier sa ken lo carga e gasto. Mester corda tur hende cu tempo cu Coastal a tuma e refineria over, a tum’e cu hopi mas gasto y cu hopi mas problema cu awendia, ta manera e ta. Pa e motibo aki mester duna e gruponan e beneficio di duda. “ Mester wak esaki manera algo completamente positivo, pa loke ta San Nicolas Business Assocation y pa e negoshinan p’ariba di brug,” Hernandez a bisa.
Hotel na San Nicolas lo bin
Hernandez a menciona cu diaranson ultimo SNBA a reuni cu porta cera, cu e grupo Three Rivers. Den e reunion aki a presenta, e rendering, despues di a reuni cu Prome Minister. “E intencion di nan no ta un intencion. Nan tin demasiado placa hinca eynan. Januari ta bay mira un hotel den full speed pa loke ta construccion,” e presidente di SNBA a comenta.
Den tur e situacion reinante pariba, e ta bisa, e movecion pa pariba no a para, segun Hernandez. Esnan cu ta p’ariba sa cu ta atende cu e mashinnan tur e dianan aki, y durante casi tur e lunanan anterior ta trahando riba e fundeshi.
E aña aki COVID a stroba hopi pa loke ta parti di construccion. E problemanan economico tambe a hunga un rol, no solamente na Aruba, pero rond mundo. Sinembargo, e grupo tabata presente. Nan a biaha bin Aruba pa reuni cu Prome Minister y cu SNBA manera un partner. Ta bay tin e hotel den construccion na 2021, el a sigura.
San Nicolas por sin refineria?
Refineria of no refineria, SNBA, basa riba tur loke a sosode, a bisa cu ta bay traha cu of sin refineria. Nan a traha den 2020 sin pensa riba e refineria. Y si e refineria bin, cu tambe ta un speransa di tur, ta e cherry riba bolo. Pero ta trahando y e plannan ta basa riba un San Nicolas sin e refineria. “Cu e refineria bin, e ta bay ta tremendo añanan cu ta bin. No ta papia di un aña, sino tur e añanan venidero,” el a bisa.
