SMAC tabata den un reunion intensivo caminda cu tabata tin varios departamento presente. E prome actividad di carnaval lo ta diasabra awo.
Shannon Henriquez, presidente di SMAC, a splica cu e reunion aki ta wordo haci tur aña. Pero teniendo cuenta cu fakkel lo ta diasabra awo, ta bon pa tur departamento ta riba e mesun liña.
Semper tin cosnan nobo ta presenta y asina pa tur stakeholder ta 100% sigur di kico tur pueblo por spera y tambe e participantenan. E reunion di diahuebs tabata di hopi importancia, pasobra e informacionnan cu a ricibi, a pas’e over tanto pa e lidernan di grupo, pero tambe ta un momento caminda cu e stakeholdernan ta sinta y brainstorm kico ta e miho pa e parada.
E parada di fakkel di diasabra, ta e parada cu a kibra tur record di participante. Ora cu ta papia di kibra record, ta papiando solamente di e parada cu ta consisti di 15 mil persona den e ruta. Ainda tin cu tene na cuenta tur e publico cu tin na banda.
Esey ta exigi por ehempel con Cuerpo Policial lo bay tackle e situacionnan, esta e planning cu di nan banda lo bin. E parada ta cuminsa 8’or y e vergunning ta te cu 2’or di marduga.
A pasa door di e secuencia. Tin un total di 12 grupo. Asina ta wak e gruponan grandi, poniendo tanto voluntario di SMAC como tambe Cuerpo Policial ta percura di nan banda, wak den nan seno con nan lo reparti nan personal pa asina toch duna e refuerso pa e parada cana bon y yega na e final na ora.
Tambe tin diferente departamentonan cu a reuni, entre otro Rode Kruis, unda cu te awor aki cu nan lo tin 25 voluntario pa yuda durante fakkel. Pero teniendo cuenta cu di parti di Imsan, nan tin cuater ambulance y tin un ambulance tambe di Rode Kruis disponibel.
Di parti di Imsan e reaccion ta, cu ta prome biaha cu lo tin asina hopi participante y nan ta wak nan risico un tiki mas halto, teniendo cuenta cu semper ta fakkel ta esun cu nan ta wordo mas pidi pa asisti.
E ora ey, ta purbando conhuntamente cu Rode Kruis, pa yega na por lo menos yega na 40 voluntario. Pero mester tene na cuenta cu tambe hopi di e voluntarionan por ta por ta un participante e anochi aki den fakkel.
Apart di esey a sinta cu Serlimar. Pa cuminsa nan ta pone bari diasabra mainta pa 6’or. Asina tambe di nan parti, marduga, ora cu parada di flambeu caba pa 3’or, nan ta pasa y haci limpiesa, pa asina e cayanan di e ruta keda limpi.
Tambe tin cu menciona, apart di Serlimar ta traha conhuntamente cu Departamento di Salubridad Publico, pa loke ta trata higiena.
Tabata tin tambe den e reunion, Cuerpo Policial, unda nan ta haci e peticion na tanto e lidernan di grupo, pa tene na cuenta cu parada ta cuminsa na ora. Apart di esaki, tin exigencianan cu ta bin cun’e. Pa loke ta e vehiculonan mester wordo gekeurd. E lidernan di grupo ya tin e personanan di contacto. E parti di Cuerpo Policial ta keur a speakernan, hanchura di cualkier truck, etc. cu ta wordo usa durante parada, pa esaki pasa door di e proceso cu Cuerpo Policial ta exigi.
DTI tambe tin su exigencianan pa loke ta e paradanan di nos carnaval, segun Henriquez.
SMAC ta sinta na mesa tambe cu Imsan y nan tambe lo tey presente durante fakkel. Simplemente awor aki ta den e planificacion, con lo atende e cantidad di personanan cu despues di parada of durante parada ta bira malo. Esey ta e meta pa purba di yuda tanto participante como publico na banda.
Di parti di SMAC ta bay un peticion na e pueblo pa por fabor, esaki ta un bunita parada cu lo bay conoce mas di 15 mil participante. Kier pa e publico tambe mantene nan mes na reglanan cu ta wordo exigi. Ta pidi pa comporta nan mes nechi y pa e participantenan, sa cu alcohol ta hunga un rol hopi grandi durante e parada di flambeu, na unda atrobe, percura pa bo tin un chauffeur designa pa bo yega cas. Y asina aki e pueblo sa di disfruta di un bon parada di flambeu, segun Shannon Henriquez di SMAC.
