Serlimar ta hunga un rol den carnaval tambe. Nan tey pa mantene e limpiesa caminda cu tin actividad di carnaval. Michael Raymond, operations manager na Serlimar, a splica cu diasabra, dia 5 di Januari, nan tin grupo for di 6’or di mainta caba, unda cu nan lo plama 160 full riba e ruta di parada di flambeu.
Esey ta pa uso di tur e participantenan como tambe e publico na banda. Ta urgi tur hende cu ta participa y esnan na banda, pa por fabor, mantene Aruba limpi. Nos ta un isla turistico. Pa e motibo aki tambe Serlimar a dicidi plama e barinan aki, pa haci’e hopi mas facil pa tur e publico presente y participantenan por haci uso di dje.
Despues di e evento, cual lo bay caba 2’or di marduga, Serlimar lo bin bek un biaha mas 3’or di marduga, dunando tur hende un ora pa nan por disfruta un tiki, pasobra e punto principal ta cu kier pa tur participante, tur miron, disfruta di e evento. Pero na final, un biaha mas, ta keda e responsabilidad di Serlimar pa percura pa nos medio ambiente keda limpi y pa e pais mes keda limpi tambe.
Sushi
Raymond ta urgi tur hende pa haci uso di e barinan aki cu lo bay tin na canto di caminda. Tur hende sa cu Serlimar lo pasa despues di e evento pa garantisa cu nos camindanan ta limpi. Pero un biaha mas, ban purba di no tira tur e sushinan riba vloer y lo tey sigur sigur 3’or di marduga diadomingo, pa haci e luga limpi.
Gruponan mester deshaci di nan sushi
Si ta posibel, e gruponan por tin saco of otro cos pa tira sushi aden, sigur sigur por haci uso tambe di e barinan canto di caminda. Pero tirando e sushi abao, na final di dia, nan lo mester wordo recogi con cu bay bin. Esey ta e tarea di Serlimar. Nan lo percura pa haci’e na un manera digno y eficiente.
Tur actividad
Serlimar su presencia lo tey den tur actividad di Carnaval y hunto cu SMAC, gradiciendo tambe KPA cu semper a compaña nan ora di haci nan trabao. Tambe Bureau City Inspector, cu tambe den e ultimo añanan aki ta yuda den e parti di siguridad. Presencia di Serlimar na final di tur parada, tur actividad di Carnaval, lo tey y Serlimar tey semper pa garantisa un biaha mas un medio ambiente sano.
