Medionan di comunicacion for di Latinoamerica, Caribe, Merca y Aruba a comparti experiencianan valioso rond di e femomeno di Inteligencia Artificial, mercado nobo, contenido nobo y tecnologia audiovisual durante e conferencia continental di periodismo digital “SIPConnect 2023” cu a tuma luga diamars pa diabierna ultimo na Miami.
E sesionnan ta reuni editornan y gerente di medionan di comunicacion di 20 pais y ta conta cu presentacionnan di lidernan di e industria periodistico, manera ta Daniel Hadad, fundado y CEO di Infobae, Claudio Cabrera, gerente di audiencia di The Athletic / The New York Times y Guy Tasaka, specialista den tecnologia di medionan di Editor & Publisher.
E gerente di relacionnan cu medionan di Latino America di Google, Rodrigo Bonilla, a comparti e ultimo desaroyo, descubrimento y orientacion di Journalism A.I. cu ta un estudio realisa cu London School of Economics. Tres productor di tecnologia di medionan a ofrece informacion y a duna conseho riba e uzo y e beneficio di maneha un sala de redaccion generando noticia y informacion via Inteligencia Artificial.
A conclui SIPConnect 2023 riba diabierna cu un bishita na e studio di Telemundo/Universal na Miami. Ta un di e centronan di produccion di informacion audiovisual mas moderno entre e medionan na Spaño di henter Merca.
Eduardo Tessler, kende a studia y tin un Masters Degree den periodismo na Universidad di South Carolina, di Columbus na New York a enfoca riba e futuro di e medianan, via nan experiencia, seminario y implementacion di proyecto. El a splica cu den e combinacion di noticia y e audiencia, ta necesario pa bo ta conecta mas cu bo audiencia, ta riba diferente plataforma di red social, conoce loke bo ta bende y pa bo producto ta duna hn balor agrega.
Den esaki tin un gap grandi awo entre e corant imprimi y esun digital. Ta nota cu pa e corant imprimi ya “Breaking news” no ta un prioridad. E gap entre e forma tradicional y digital ta cu e tradicional no conoce su audiencia. Nan no tabata interesa nunca pa sa ken ta nan lesadonan. Corant digital DATA ta esencial y ta conseha pa sigui asina tambe.
Rodrigo Bonilla Hastings, e ta e Newspaper Industry Relations Manager pa Google y ta staciona na Mexico City, ta un graduado den historia cu un “masters degree” den International Cooperation and Development Studies di e Universidad Paris1. El a comparti su conocemento riba uzo di AI den prensa. JournalismAI lo fungi como consultancy y na mes momento e ta un academia tambe caminda cu ta guia redactornan den un sistema “AI friendly” pa miho funcionamento di e redaccion.
Antes tabata existi “tape recorder” cu tabata un invento revolucionario den su tempo, pero util pa corda locual cu hende ta bisa. Asina mes no mester descuida nunca e cara di esun cu bo ta entrevista, como cu e lo bay bisa bo mas den su stem y hopi biaha contrario di locual e ta bisa. Pesey, ora referi awo na AI Journalism, mester ta cla si cu t’e hende mes lo tin cu guia esaki como cu e parti humano lo ta esun cu lo dicidi e contenido final.
Marcelo Miralles Lporre, Gerente General di Editorial La Patria, corant di Bolivia – 104 aña di existencia – funda 1919, a splica cu aunke nan corant ta imprimi (papel), cu nan a mira y realisa cambio pa digital cu hopi anticipacion. Na 2009 caba a cuminsa e trayecto y adaptacion. Locual cu tabata nan suerte, cu a realisa cu nan fuerte nan tabata tin e den cas. Semper nan tabatin personal in house cu tabata tecnico di software-programming-data analist, etc. Esaki nan a reconoce na tempo y a pone nan traha riba un sistema di AI Program cu ta unicamente pa uzo interno, nan no ta bende programa.
Google pa hopi aña caba ta organisa SIPConnect hunto cu SIP pa tur su miembronan. E ta e momemto ideal pa medionan di comunicacion topa cu otro, intercambia conocemento, experiencia y ideanan creativo.
Tocante SIP
E organisacion “Inter American Press Association” of na Spaño yama “Sociedad Inter Americana de Prensa” ta existi desde aña 1943 y ta representa mas di 1300 miembro, mayoria medionan di comunicacion den Norte America, Sur America y Caribe. Su oficina principal ta situa na Miami. Headines Group, cas editorial di e portal di noticia 24ora.com y e corant digital Trempan ta un miembro activo di e organisacion internacional aki. Na Aruba tin solamente tres medio di comunicacion como miembro, esta 24ora.com, Diario y Bon Dia Aruba. Desde aña 2017 colega Marko Espinoza ta observador di SIP, den cuadro di su funcion como vice-presidente di e comision pa Libertad di Prensa pa Aruba.
Tocante e crecemento di 24ora.com
Na aña 2022 a raporta un crecemento di 33,59% den audiencia riba e website mas mira di Aruba. Tambe a nota desaroyonan importante den cambio di comportacion di usuarionan, por ehempel e pagina mas mira ta e frontpage di 24ora pero e di dos pagina mas mira a bira anuncio di morto, sigui pa suceso y despues e pagina cu noticia local. Riba Facebook tambe 24ora ta raporta un crecemento impresionante! A cera aña cu no menos di 119.591 likes riba Facebook, mientras cu e cantidad di siguido (followers) tabata 165.977. Riba Instagram tin 19.726 siguido. Cifranan aki ta marca un crecemento grandi compara cu e aña prome. Den video ta raporta cu e aña cu a transcuri, usuarionan a mira 80.9 miyon minuut di video riba Facebook, cu ta traduci den 11.3% menos cu e aña anterior. Esey por tin di haber cu awendia ta publica videonan riba Youtube pa bay riba e site y riba Facebook ta keda separa. Di otro banda Youtube a sigui crece. E videonan miho mira ta di februari y maart di e aña cu a termina. Esun miho mira ta dia 11 di februari 2022, pa buskeda pa un persona cu a agredi chauffeur di bus y core bay sconde den hotel. A mira 1.272.962 minuut na video. Un total di 776K usuario a mir’e. Esun mas mira ta di 20 di maart 2022, di un brommer di coriente cu a pega candela den un parada di nos Dia Nacional. Un total di 914.466 usuario a mira e video aki! Entre e videonan miho y mas mira ta tambe e edicionnan di Enfoke di merdia.
Trempan ta creciendo
Den transcurso di aña 2020, a start cu e corant digital Trempan. Esey ta conkistando un otro mercado, di usuarionan cu ta prefera noticia den un forma ordena tras di otro den forma di un corant. Ta presenta un corant yen di contenido, cu video den dje y masha moderno. Un publico grandi a acept’e y a cambia di e corant tradicional, cu hopi biaha ta yena di noticia cu a lesa online caba, pa lesa Trempan cu ta yena di noticia fresco. Produccion di Trempan ta den man di un ekipo separa di profesionalnan den media.
Tocante 24ora.com
Mark Benson Denz a funda e prome website di noticia na Aruba, 24ora.com (Prome den Noticia) dia 28 di maart 2007. Awendia e ta e medio di comunicacion di mas grandi na Aruba. Diariamente mas di 50 mil diferente usuario ta subi online, mas di 4 biaha y ta keda casi 3 minuut cada biaha. Pa siman ta surpasa 100 mil usuario y pa luna e ta mas di 250 mil diferente usuario. Riba Facebook nos ta e pagina di Aruba cu mas “likes” (122K), cu mas di 174K followers y tambe cu mas “engagement”.
