E sindicato mas grandi di Corsou ABVO a organisa un magno evento pa celebra su 87 aña di existencia. Ta un organisacion cu ta conta cu mas di cuater mil miembro, den diferente sector tanto gubernamental, priva, comercial y industria cu ta haci di ABVO un organisacion diversifica cu ta sali na defensa di su miembronan na momento di inhusticia.
Durante e anochi aki a haya e oportunidad di hiba combersacion cu e presidente di sindicato ABVO, George Henrnandez, cu tabata sumamente satisfecho di con e anochi a bay. Hopi preparacion y adelanta pa logra pone un magno evento asina riba pia, pero sigur contento di por celebra cu 87 aña cu e miembronan presente.
E idea di haya e miembronan sinti nan mes na cas dushi den ambiente cant’i awa den Bahia di Santa Ana, caminda a trece hunto agrupacion manera Era, Classic XD, Dj Peloz y for di Aruba Claudius Philips y OREO. E escogencia pa OREO ta bin debi cu e banda aki ta uno hopi gusta mes na Corsou y semper cu e bin ta mira claramente con e pueblo ta biba cu cada piesa cu e presenta.
Pa locual ta ABVO mes, e plan ta pa sigui crece y sigui yuda nan miembronan y bringa contra inhusticia cu ta tumando luga, gran parti den sector di comercio y industria caminda hopi inhusticia ta tumando luga como cu no tin un gran representacion ta tuma luga di sindicato. Ta caminda ABVO lo kier hinca su mes mas pa asina Sali na vanguardia di e dicho sectornan.
A surpasa tempo di pandemia aunke ABVO cu ta gran representacion di e sector publico cu afortunadamente a ricibi sosten di Hulanda y a haci cu a sali di bon for di dje.
Durante e anochi a calcula cu a presenta riba dos mil hende den Mathey Werf caminda el a tuma luga. Directiva a traha hopi duro pa mira un evento exitoso tras di lomba.
A haya oportunidad tambe di papia cu Gwendell Mercelina JR. Parlamentario Partido Nacional di Pueblo (PNP) cu a bin duna celebra hunto cu e miembronan, brinda sosten na e sindicato y combersa poco riba punto di importancia cu ta biba na e momento aki na Corsou.
Marcelina a expresa cu ABVO en berdad ta un sindicato hopi special, cual ta un sindicato funda pa dokter Moises Frumencio da Costa Gomez, cu ta e mes un fundador di Partido Nacional di Pueblo, cu ta haci cu ta compronde e esencia di con mester mira representacion sindical trahando riba vanguardia di e trahadonan/ambtenaar.
Deseo di Marcelina ta di mira un rejuvenecimento. Un atraccion pa e hobennan por compronde dicon e mundo sindical ta importante. E bloke, e union ta e forsa den e sector laboral, tin di sigui mira oportunidad habri pa nos hobennan, paso e no ta bin di su mes. Cu un celebracion di 87 aña ta di admira como cu e no ta facil pero tur e historia cu a bin skirbi pa e sindicato aki awe t’ey, mester dun’e su respet.
Como hoben parlamentario Gwendell Mercelina JR. A bin ta purba di haci e diferencia, di tin un bos, tin biaha poco critico pero semper den e esencia di e importancia di tin diferente opinion y pensamento pero cu un meta comun.
E diferencia den generacion no ta importa si bo ta traha na un causa grandi, manera di traha pa cada trahado bay dilanti, pa nan posicion laboral drecha y cada generacion tin di yuda traha pa esaki. E pensionado cu tin cu bay disfruta di esaki y hoben cu ta bay drenta pa traha/ cuida pa esun di dje keda existi.
Tin cu sigui incentiva, bin cu idea nobo y Aruba ta dunando un bon ehempel den esaki caminda a habri espacio pa drenta sindicato den forma individual (como persona) y cu por bira un forsa/ metodo diferente cu Corsou por asimila, sigui acumula experiencia y uni pa asina Sali na vanguardia di e trahadonan cu mas mester di dje.
Na final Mercelina no a laga di menciona cu Claudius y OREO ta unico, Corsou stima Claudius di semper cu a yena e pista di baile yen yen pa asina, hunto cu demas agrupacion haci di e anochi di celebracion di ABVO uno grandi.
