Durante un ceremonia oficial na e paleis presidencial na Surnam, Ursell Arends, e Vicepremier di Aruba y alabes Minister di Transporte, Integridad, Naturalesa y Asunto di nos Grandinan a topa cu Presidente di Surnam. E bishita ta relaciona cu un invitacion di e Gobierno di Surnam relaciona cu e festividadnan rond di abolicion di sclavitud exactamente 160 aña pasa.
Lo tin combersacionnan bilateral entre e delegacion di Gobierno di Aruba y di Surnam. Diasabra, riba Dia di Libertad, lo conta cu bishita tambe di e Vicepremier di Hulanda, esta Minister Wopke Hoekstra na Surnam. Hunto cu demas invitadonan internacional, lo participa na e diferente actividadnan rond di conmemoracion y celebracion di Keti Koti.
Minister Ursell Arends a atende reunion den paleis presidencial di e pais, compaña pa e coordinador di Fraccion di Raiz den Parlamento, esta Carlos Guaimo, candidato # 6 riba e ultimo lista di Raiz na juni 2021 y cu a logra no mas di 221 voto individual.
Remarcabel ta cu ambos e minister como e coordinador di Raiz, aunke a atende un reunion oficial den un paleis presidencial, toch no a bisti bachi ni dashi. E presidente di Surnam si tabata bacha, mientras cu e delegacion Rubiano a cana kibra cu nan camisa manga largo.
Presidente di e Republica di Surnam, segun e constitucion di aña 1987, ta e hefe di estado y hefe di gobierno di Surnam y comandante di ehercito Nacional di Surnam (SNL ). E presidente tambe ta nombra su gabinete.
E presidente actual ta Chan Santokhi, ex-hefe di polis. E ta afilia na Partido Reformista Progresista (VHP). A eligi Santokhi dia 13 di juli di aña 2020 como presidente pa aclamacion den un eleccion sin oposicion. A hurament’e dia 16 di juli na Onafhankelijkheidsplein na Paramaribo den un ceremonia sin presencia publico debi na e pandemia COVID-19.
A crea e funcion di presidente despues di a declara nan independencia di Reino Hulandes na aña 1975. Te cu aña 1987, e funcion tabata mas tanto ceremonial. E prome funcionario tabata Johan Ferrier, maestro di scol y político veterano cu tabata gobernador desde aña 1968. El a renuncia como presidente na augustus di aña 1980, varios luna despues di un golpi di estado. Desde e tempo ey te aña 1988, tur e presidentenan tabata esencialmente hendenan instala door di ehercito di Dési Bouterse, cu a goberna como un líder, de facto, cu masha poco control riba su poder. A reestablece democracia na aña 1988, un aña despues di a adopta e constitucion, den cual a regla e deber- y responsabilidadnan di e presidente. Dia 24 di december 1990, dos dia despues di e renuncia di Bouterse como comandante di ehercito, a tuma luga un otro golpi di estado y a baha presidente Ramsewak Shankar. A nombra e ex-hefe di polis y ex-comandante interino di ehercito, Ivan Graanoogst, como presidente interino. Dia 27 di december 1990, Johannes Kraag a asumi e presidencia. Desde aña 1991, e presidente ta elegi democraticamente.
