Den un pais moderno un systema solido di pensioen ta un di e derechonan mas cardinal den un sociedad. Pa proteha tambe esunnan di menos recurso y e grupo aki tambe di un futuro humano.
Na e momentonan aki na Aruba caba ta tende storianan dramatico di pensionadonan cu mester sigui traha paso nan simplemente no por biba riba e pensioen di SVb.
Esaki riba su mes caba ta algo profundamente lamentabel. Pa hasi esaki pio y riba nivel di un tragedia di Opera, por conclui cu Pensioen Fonds sociaal di SVb ta failliet.
Un disaster gigantesco
E autor ta basa esaki riba conversacionnan anonimo cu ex-ehecutivonan di Centrale Bank van Aruba y simplemente usando e raportahenan di SVb mes.
Imagina bo:
Bo ta un trahador honesto, sin otro moda di pensioen priva.
Bo a soda tur dia y traha duro.
Bo a paga bo premie honestamente.
Sperando na fin di yega bo edad di pensioen cu finalmente por wak algo bek di esaki.
Awo imagina cu bo lo haya un carta bisando. “Sorry e placa no tey”. Cual caba ta un problema profundo cu no tin jaarverslag mas recien.
Ta invita pueblo di Aruba y vooral expertonan economico pa studia e documentonan aki y pa puntra preguntanan hopi critico over e echo cu den nan mesun jaarverslag SVb su mes ta admiti cu sin medidanan extremo mane stipula den e landspakket e fondo lo ta bashi bashi pa 2032. Esaki tambe no ta tuma den cuenta cu por bin periodonan dificil economico riba nivel globaal, cual e author a skirbi hopi over di esaki den pasado. Tambe e situacion di salubridad simplemente malo di Aruba su populacion, cual mester tuma na cuenta.
Unda e Check & Balances a keda?
Den un pais democratico ta suppose di tin varios “Checks & Balances”
Na prome nivel e advisornan di un ministro.
Despues e colega ministronan den un coalicion por atende cu e Minister concerni.
Si esaki tampoco no pasa tin parlamento y vooral opocision cu tin como tarea pa pone pueblo na altura di e tragedio aki.
En fin si tur esaki faya lo tin otro institutonan cu mester atende cu cosnan aki.
Te cu e autor aki sa y na miho di su mesun conocemento ta papia relativamente hopi tiki over e topico aki, bezig ta wak e demension severo di e problema aki.
Kibra cultura di miedo
Los di e articulo singular aki, e autor ta sinti cu mester kibra e cultura di miedo na Aruba. Porta tin hende cu kier alerta pueblo of instancianan concerni over varios cos pero simplemente no ta hasi esey paso lo wordo defama, lo wordo boycotia y eventualmenten castiga. Simplemente pa un opinion honesto cu ademas ta basa riba data concreto.
E autor ta spera cu e no lo mester sufri cualkier forma di castigo pa atende pueblo na esaki.
Tambe por wel di ta cu mi conclusionan no ta cuadra y ta invita un dialogo riba un nivel halto y adecua sin ataca persona individual pa papia over e tampoco aki. Ta spera enberdad pa pueblo di Aruba en general cu mi opinion ta fout.
