Di parti di SIMAR, presidente Angelique Quijada, a splica cu a tuma contacto cu director di Stichting Protestants Christelijk Onderwijs Aruba (SPCOA) pa puntra kico t’e motibo cu John Wesley lo cera. El a haya como contesta cu tin diferente factor, di cual un di nan cu e cantidad di alumno ta bahando y e asunto di finansa, cual ta comprendibel: si no tin suficiente alumno, no tin suficiente placa pa cubri e gastonan.
SIMAR a reuni cu e docentenan di John Wesley, ya cu nan a acerca pa nan sa riba nan derecho. Hurista di SIMAR tabat’ey presente den e reunion p’asina observa nan contract, kico ta para loke nan a firma. A keda di reuni un biaha mas cu director di SPCOA, hunto cu algun miembro di directiva, hunto cu e maestronan.
Nan tin dos aña sigur riba nan salario, segun SPCOA. Esey ta algo sigur cu nan tin un alivio riba dje. Aunke SPCOA ta buscando pa reubica e docentenan aki, sea na Mon Plaisir mes, DPS of na SKOA.
Quijada a sigui splica cu e tin di compronde di e director di SPCOA cu nan a cuminsa papia cu e otro directivanan, manera DPS, SKOA y Mon Plaisir pa mira ki chens por hinca e maestronan.
Pa loke t’e alumnonan, a pone e mayornan na altura y a pidi e scolnan na San Nicolas manera Filomena College y Abraham de Veer entre otro y Mon Plaisir na Playa, pa por incorpora e alumnonan di John Wesley.
SPCOA a dicidi pa laga e scol habri, riba un beneficio di duda, cu e scol lo promove pa haya mas alumno, cual no a sosode. Ya caba klas di MAVO 4 no t’ey p’e aña aki. E scol ya tabata birando chikito manera un dependance. No tabatin maestro cu tabata trahando full-time n’e scol y tambe nan Mon Plaisir. Kico por haci aworaki ta den man di SPCOA.
