Na Hulanda a surgi un situacion cu mester a cambia un maneho pa scucha sospecbosonan, den caso cu tin periodista presente. Si e sospechosonan ta den combersacion cu periodista no ta sin mas autoridadnan concerni por sigui scucha e combersacion. Por a tuma nota di un articulo na Hulanda cu ta menciona cu Ministerio Publico entrante prome di mei awo ta bay cambia reglanan rond di e tema di tapmento di sospechosonan den presencia di periodistanan.
Entrante e fecha menciona mester pidi autorisacion di hues-comisario adelanta pa graba comunicacion confidencial, den caso cu tin un periodista envolvi. A haci e anuncio dialuna mainta. E motibo pa trece cambio den e maneho aki ta un investigacion penal contra tres ex dirigente di Stichting Hulptroepen Alliantie riba e famoso deal di tapaboca.
Na october ultimo a bira conoci cu OM a scucha un combersacion entre periodistanan di De Correspondent y Sywert van Lienden y su socionan. OM a bisa anteriormente cu hues-comisario a duna permiso pa e tapmento na e punto di e reunion. Pero e anochi prome a resulta cu lo tin periodistanan tambe presente.
Oficialnan di Functioneel Parket a dicidi cu nan por sigui scucha e combersacionnan. E scuchamento tabata mas bien riba e sospechosonan y no e periodistanan. Den e regla nobo ta para cu mester informa un hues-comisario di e situacion inmediatamente.
E funcionario aki lo bay dicidi si por sigui scucha e combersacionnan. Y si e tin duna su aprobacion, tambe mester wak si e por sosode bou di e mesun condicionnan. E fiscal mayor tambe mester duna su aprobacion pa pone aparatonan pa scucha combersacion di e sospechoso(nan).
Den e caso di Van Lienden esey no a sosode. Pa finalisa mester pone College di Procurador-General y mando di OM adelanta na altura di e situacion aki.
