Riba diabierna 19 di april 2024 den su reunion general di miembresia, a eligi e Hunta di Directiva di Aruba Trade and Instustry Association (ATIA). Durante e prome encuentro di e Hunta di Directiva nobo a eligi e hunta diario esta e “Daily Board” pa 2024 – 2025.
Mester indica cu e “Daily Board” ta forma pa e siguiente posicion nan: Presidente, Vice Presidente, Tesorero, y Secretario. E hunta a eligi Sr. Danilo Werleman como su presidente nobo. Tambe a re-eligi, Gina Habibe como vice-presidentey, Enrique “Tito” de Cuba como secretario y Andrew Harms, como tesorero respectivamente. Tambe a eligi e reemplasantenan di e tesorero y secretario kende nan ta Fred Steeghs y Jenniffer Figaroa-Guzman respectivamente.
Director di ATIA ta sumamente contento cu e “Daily Board” cu lo duna guia den aña 2024 y 2025, sigur un aña yen di reto, entre otro e situacion cu nos mercado laboral ta aden awo unda no tin suficiente hende pa traha y tin hopi proyecto nobo na caminda.
E escasez di labor tin un efecto directo y indirecto riba comercio y economia di Aruba. ATIA, awo specialmente, su expertonan ta deliberando solucionnan practico y innovativo pa por alivia temporalmente e escasez aki. Tambe ATIA lo forma parti di un task force, unda hunto cu sindicato y gobierno lo presenta solucionnan temporal cu ta practico. Como gremio nos ta na fabor pa e ley laboral bira uno mas moderno, agil y “performance based”.
Banda di e retonan ATIA lo organisa diferente evento pa miembro y pa publico. Algun di e eventonan pa aña 2024 ta diferente business mixers, encuentro cu Departamento di Impuesto y Aduana, varios workshops y tambe e Networking event mas grandi di Aruba cu ta ATIA su Corporate event Annual. Finalmente, e director a informa cu 2024 lo mira e regreso di LIDERA na september, un conferencia cu a impacta mas cu 800 persona na 2022. ATIA ta suplica pa sigui nan riba nan rednan social pa tur informacion.
ATIA
A funda Aruba Trade and Industry Association (ATIA) na aña 1945 y ta e organisacion principal cu ta representa empresanan, empresarionan y comercio na Aruba. E meta di ATIA ta pa defende, promove y proteha e interesnan di su miembronan y comercio di Aruba en general. Pa mas informacion por bishita www.atiaruba.org of nos rednan social www.facebook.com/arubatrade, www.instagram.com/atiaruba, y https://www.linkedin.com/company/aruba-trade-and-industry-association
