Nos por a tuma nota di cuestionamento door di Fraccion di MAS pa loke ta trata suma presupuesta pa asfalta caminda. Nan a haci un serie di pregunta al respecto cual a ser contesta debidamente door di Gobierno. Cu Marisol Tromp ta haya straño e presupuesto chikito cu a reserva pa asfalta caminda den 2024 ta remarcabel.
Alabes ta remarcabel e relacion cu kier trece entre e suma cu ta keda genera mediante impuesto di vehiculo y e suma cu ta keda aloca pa drecha of mantene careteranan. Ta un lastima cu Marisol cu tur su añanan di experiencia como parlamentario y minister di Infrastructura ta cuestiona e situacion mientras e sa mihor.
Na prome luga impuesto di vehiculo no ta un “bestemmingsheffing”, esta cu loke ta keda genera na entrada mediante e impuesto aki no ta destina specificamente pa cubri gasto di of inversion den algo specificio. Marisol Tromp sa esaki di experiencia y toch kier malinforma of uza e informacion incorectamente pa influencia y manipula opinion publico.
Tambe ta bon pa informa pueblo kico tabata e suma cu añanan anterior a keda presupuesta pa cubri e gastonan di caretera. Na 2015, tempo di bonansa y Marisol sosteniendo e Gobierno di AVP e tempo ey, e suma presupuesta tabata 3,5 miyon, na 2016: 3 miyon, na 2017: 5 miyon, na 2018: 6 miyon, 2019: 5 miyon, 2020: 5 miyon, 2021: 0, 2022: 4.2 miyon, 2023 3.5 miyon y pa 2024: 10.4 miyon.
Durante tratamento di presupuesto di DOW, Minister President Evelyn Wever-Croes a duna splicacion amplio di e punto aki. Gobierno a splica un biaha mas cu door di e situacion di pandemia y nos finansa, prioridad a keda poni riba otro aspecto cu ta bon conoci pa nos tur, manera siguridad, salubridad y bienestar general di nos hende y famianan. Pocopoco nos ta recuperando y por hisa e suma cu ta inverti den nos careteranan. Cual na ningun momento a keda sin subraya e necesidad di esaki pero mirando nos circunstancia mester a pone prioridad otro caminda.
