Ayera den sala di Parlamento nos ta trata e cuadro legal pa loke ta trata e ayudo financiero FASE cu a keda duna na nos hendenan cu a perde entrada door di e pandemia. Un sosten cu tabata asina esencial y necesario. Un sosten cu mester a bin hopi rapido mientras ta concretisa e cuadro legal necesario. “Cu esaki a tuma hopi tempo porta ta un punto di discucion pero mi ta kere cu na ningun momento nos mester perde e realidad di nos situacion desde 13 di maart 2020 for di bista”, asina Shailiny Tromp-Lee, parlamentario di MEP, a duna di conoce.
Contrario na loke oposicion a insinua durante e reunion publico, Gabinete Wever-Croes a haci hopi esfuerso pa brinda ayudo financiero na nos hendenan cu a perde entrada of trabou mediante FASE. Na mes momento nan a yuda nos companianan cu subsidio di salario pa nan
por a mantene nos hendenan na pia di trabou y a percura pa duna sosten financiero na companianan chikito y mediano pa nan por a sobrevivi. Cu otro palabra gobierno a actua mesora pa por garantisa un tipo di stabilidad y pa preveni pobresa serio den nos comunidad.
Durante e reunion, mi a enfatisa e echo cu e fraccion mas grandi den oposicion kier manera lubida di COVID, mas bien kier scrap e di nos historia. Nan kier lubida e impacto devastador cu e tabatin y ainda tin riba nos pais. Realidad ta cu dia 13 maart 2020 Aruba a conoce e prome dos caso di covid y desde e dia ey nos mundo a bira boca abou. Ya pa dia 16 di maart Gobierno a dicidi di cera nos scolnan y cera nos frontera. Tres dia despues, dia 19 di maart ya Gobierno a introduci toque de queda y despues a sigui cu shelter in place. Mas cu
claro tur esaki tabatin su consecuencia. Varios compania mester a cera nan porta pa algun siman, nos turismo a bay plat y nan a mira nan entradanan bay drasticamente atras.
No a tarda mucho tempo cu retiro a cuminsa cay y of nos hendenan a cuminsa perde entrada masalmente. Na principio tabata papia di 25.000 persona cu lo perde nan trabou of parti di nan entrada y no lo por a provee mas pa nan famia. Esaki a pone un presion hopi grandi riba gobierno, cu no obstante e presion, na mi opinion, a actua rapidamente.
“Mi persona y Fraccion di MEP desde un principio a sostene tur e sosten financiero presenta y implementa pa Gobierno. Mas cu claro nos tabata consciente di e echo cu diferente cuadro legal necesario no por keda cristalisa mesora. Nos tur conoce e situacion di personal di
Directie Wetgeving en Juridische Zaken y sigur no mester lubida e presion den cual nan a bin encontra nan mes door di e pandemia y e trabounan crucial cu nan mester a realisa pa Gobierno. Sigur pa loke ta trata e situacion y negosacionnan cu Hulanda. P’esey mes tin tur comprension pa e proceso y mas cu claro a aproba e cuadro legal di FASE ayera”, asina Lee a termina bisando.
