En conexion cu mantencion necesario, Veterinaire Dienst ta informa cu nan servicio di abattoir lo ta cera cuminsando diahuebs, 20 di mei 2021 te cu dialuna 25 di mei 2021. Entrante diamars, 26 di mei 2021, abattoir lo sigui duna su servicio di matansa riba afspraak. Pa un cita/afspraak riba e dianan di matansa cu ta riba diamars y diahuebs, mester yama por lo menos un dia prome na 5224310.
Lo duna servicio bou di condicionnan estricto di e.o. distancia fisico y prohibicion di aglomeracion, pa asina evita un cantidad grandi di hende riba tereno di abattoir na mes momento. Veterinaire Dienst ta haci un suplica na esunnan cu ta bin busca servicio cerca nan pa cumpli cu tur condicion stipula. Es cu no kier cumpli cu e condicionnan di proteccion, lo ta pidi pa bandona e localidad.
Veterinaire Dienst lo traha a base di e siguiente condicionnan:
· Criadonan di bestia mester traha un cita adelanta cerca nan administracion na telefon : 5224310 y informa cu cuanto bestia lo e bin. Sin cita lo no duna servicio
· Riba e dia y orario stipula e criado di bestia mester raporta su mes na e entrada (gate). Si e persona ta laat of e no a presenta, no lo honra e peticion mas y tin di traha un cita nobo.
· Ta controla e criado di bestia na entrada si e tin cita. Si e tin cita e lo haya instruccion pa pone su bestianan den e hokinan asigna y despues e mester bandona tereno di Veterinaire Dienst.
· Despues ta keur y mata e bestianan conforme e reglanan.
Ora cu Veterinaire Dienst caba cu e matansa, ta yama e doño e mes un dia pa presenta na entrada y busca su bestianan despues cu a paga pa e servicio. E pago di servicio mester ta cu ATM of placa cash exacto hinca den un envelop.
Servicio Veterinario ta informa cu e medidanan aki ta necesario debi na e crisis di Coronavirus y ta necesario pa cuida salud di nos personal, pero tambe di nos clientenan. Si riba dia di bo cita bo tin sintoma manera tosamento, keintura, dolor di garganta, nan ta suplica bo pa no bin na nos servicio pero pidi pa haci cambio di cita.
