For di 29 di maart te cu 26 di april ultimo 6 tata a participa na e proyecto “Best Dad Ever”. Best Dad Ever a ta un proyecto caminda durante 10 sesion, e tatanan ta traha riba nan habilidad pa ta un miho tata di locual cu nan ta caba. Best Dad Ever ta stimula e participacion di hende homber den educacion di nan yiunan.
Estudio haci na Aruba na 2012 a mustra cu e relacion entre tata y yiu na Aruba lo ta zwak. Esaki a pone cu Fundacion Telefon pa Hubentud Aruba a laga haci un estudio mas profundo pa asina aki haya un mihor bista di kico e tatanan ta pensa di nan rol den educacion di nan yiu. Un di e resultadonan di e estudio ta cu e tatanan kier ta mas involucra cu educacion di nan yiu. Esaki a pone cu Fundacion Telefon pa Hubentud Aruba a studia diferente ‘best practices’ na Hulanda, Canada, Merca y Latino America y despues a desaroya Best Dad Ever.
Hunto cu Tienda di Educacion a cuminsa duna Best Dad Ever na e prome 7 tatanan na 2018 y despues un grupo di 11 tata y un grupo di 10 tata den 2019. E aña aki Fundacion Telefon pa Hubentud Aruba y Tienda di Educacion a ser acerca pa Centro Hoben y Famia pa asina aki ofrece un grupo di 6 tata Best Dad Ever. Dia 29 di maart a cuminsa cu e grupo di 6 tata y a termina riba diamars 26 di april.
Durante 10 sesion a trata diferente tema. E temanan cu ta parti di e sesionan ta por ehempel:
Impacto di un tata
Embaraso
Nacemento
Planea famia
Duna cuido
Necesidad y Derecho di mucha
Violencia
Genero y Division di cuido. Otro partnernan cu tambe tabatin un rol durante algun di e sesionan ta Famia Planea, psicologo Johnny Boekhoudt y partera Stephanie Daal.
E 6 tatanan cu a participa a termina cu un certificado como muestra di nan participacion na Best Dad Ever. A fortalece nan habilidadnan y a añadi abilidadnan nobo pa asina por ta un mihor tata ainda.
Un gradicimento ta bay na Setar N.V, Web Aruba N.V, Aruba Airport Authority N.V., Centro Hoben y Famia, Famia Planea, Stephanie Daal y drs. Johnny Boekhoudt.
Pa mas informacion tocante Best Dad Ever por tuma contacto cu Fundacion Telefon pa Hubentud Aruba via nos facebook: https://www.facebook.com/telefon.hubentud/, email: [email protected] of telefon 5886138/ 5884011.
