N.V ELMAR a hay’e confronta cu no un ni dos, sino tres ‘storing’ tras di otro den e ultimo 24 oranan. Ta obvio cu e compania nacional di distribucion di coriente no tin su red bou control y dificilmente por garantisa comunidad un suministro confiabel mas. Ta keda na Gobierno di Aruba, como doño di Utilities Aruba NV, pa dicidi cuanto pasenshi mas lo tin, prome cu pueblo aplica consecuencia politico pa esnan politicamente responsabel!
E prome incidente a sosode pa 12:12 am den e bario di Jan flemming y vecindario, ora un poste di luz a pega na candela. Mester remarca cu e condicionnan ambiental ta hunga un rol cu e tipo di incidentenan aki yama “Paalbrand” por sosode. E saltpeter riba e liña di distribucion y e awasero cu a fingi riba e liña ta causa “Paalbrand”. E tecniconan di ELMAR a actua lihe y pa 12:54 AM a resolve e problema y a reestablece e suministro di coriente pa e barionan concerni.
E di dos incidente di storing di coriente a sosode pa 4:09 AM y a afecta e barionan di Savaneta te cu Noord. Dos ‘onderstation’ di ELMAR a keda afecta pa e storing aki. WEB a informa cu e storing aki a origina cerca di nan mes y despues di alrededor di 45 minuut WEB a resolve e problema cu a surgi y por a bolbe suministra coriente na ELMAR y reestablece coriente pa tur e barionan afecta.
E di tres incidente a sosode pa 5:05 AM y a afecta e barionan di Seroe Pita te cu Tamarijn y otro barionan den cercania. Tecniconan di ELMAR tambe a yega rapido pa cuminsa haci e investigacion necesario di kico por ta e causa. Pa 5:30 AM tecniconan di ELMAR a identifica e problema y a logra resolv’e. Pa 5:30 di mainta a logra reestablece coriente pa e barionan afecta. Mientrastanto a bay over na haci trabounan di reparacion den e area directamente afecta.
N.V. ELMAR ta bolbe pidi disculpa pa e inconveniencia cu a surgi y ta sigui traha pa mantene e grid di Aruba den bon condicion y stabil, aunke cu den e ultimo luna aki ta demostra cu nan no ta logrando!
