Diahuebs mainta Fundacion Telefon pa Hubentud a ricibi bishita di Su Altesa Real (SAR) Prinses Beatrix cual tabata un gran honor di tin un bishita unda a bin mira kico tur e Fundacion ta bezig cu ne.
For di loke ta e telefon, email y chat, atendi for di dialuna te cu diadomingo pa medio di TPH su mentornan. Tur mucha hoben adolecente riba primordialmente isla di Aruba, pero aña pasa TPH a cuminsa brinda servicio na muchanan di Boneiro tambe, hunto cu Sint Eustatius.
“El a scucha tur esaki y keda impresiona riba e trabao cu e mentornan ta haci,” segun director di Telefon pa Hubentud, James Sneek riba reaccion di Prinses Beatrix. “Tabata tin momento unda nos por a brinda splicacion na con nos ta percura pafo di orario di 2’or pa 6’or di Atardi cual ta telefon y chat, cu nos por keda brinda servicio.” Problemanan no ta pasa entre e orarionan aki, dus sigur prome y despues di e orarionan aki, problemanan social no ta conoce un orario. Prinses Beatrix a haya un splicacion riba tur charla, tayer y projecto cu TPH ta duna na scolnan, club deportivo y mas durante oranan di mainta. El a haya informacion riba tema di e projectonan, cual ta brinda un indicacion riba kico ta bibando den nos mucha y hoben aki na Aruba.
LOGO NOBO DESPUES DI 24 AÑA
TPH no ta sinta warda pa e mucha of hoben tuma contacto pa haci algo, nan ta traha preventivamente cu ‘131 Outreach’ na e scolnan pa cu esaki. Banda di esey tambe, e Fundacion tabata preparando pa devela nan logo nobo. Aña pasa a haci un competencia di pintura cu ocho scol basico, y cinco scol voorgezet onderwijs. E fundacion a saca naturalmente un ganado pa ambos, pa despues bay over na saca un ganado general cual tabata Sophie-Belle Rafini. “El a trece un pintura cu ta ilustra kico nos tabata buscando, algo cu lo representa e organisacion pa e siguiente 25 aña,” segun Sneek.
